Turmush — Бийгазы Таалайбеков жетектеген Бакай-Ата районунун Шадыкан айыл аймагында аяктап жаткан 2023-жылы бир топ ири долбоолор ишке ашты. Аймактык кабарчы айыл аймакта аткарылган иштер боюнча маалымат топтоду.
32 жаштагы Бийгазы Таалайбеков 2021-жылдын июнь айынан бери Шадыкан айыл аймагынын (Түйтө жана Ынтымак айылдарын камтыйт) башчысы болуп иштеп келет. Ал И.Скрябин атындагы агрардык жогорку окуу жайын аяктаган. 2014-жылдан 2019-жылга чейин АРИСте таза суу жана жайыт долбоорунда иштеп келген. 2016-2020-жылдары Шадыкан айылдык кеңешинде депутат болгон.
АРИС агенттиги тарабынан гранттык негизде Ынтымак айылындагы «Керемет көч» жана «Алтын уя» бала бакчасынын санитардык абалын жакшыртууга жана заманбап шарт түзүүгө 3 млн 496 миң 660 сомго долбоор ишке ашырылды.
«Капиталдык салымдар» беренеси тарабынан жалпы билим берүүчү Капалов Эшимбек атындагы орто мектептин курулуш иштери жүрүп жатат. Келерки жылдын башында мектепти пайдаланууга бери жагы пландалууда.
Ынтымак айылындагы бардык жашоочулар электр жарыгы менен камсыздалат. Жергиликтүү бюджет тарабынан Кадырбек, Молтой, Эсенбеков Асанбек, Лесная көчөлөрүнө 1 млн 421миң 480 сомго подстанция жана электр чубалгыларын орнотуу үчүн материалдар сатып алынган.
Ынтымак айылындагы «Алтын уя» бала бакчасына 181 миң 300 сомго, элдин коопсуздугу үчүн көчө жээктерине 97 миң 360 сомго, жалпысынан 278 миң 660 сомго видеокөзөмөл орнотулду.
Шадыкан айыл аймагындагы элди таза суу менен камсыз кылуучу скважина тазаланып, жергиликтүү бюджеттен 565 миң 210 сомго насос жана керектүү шаймандар алынып берилди.
Ынтымак айылындагы «Алтын уя» бала бакчасына жана Түйтө айылындагы С.Көчөрбаев атындагы орто мектебинин жылытуу системасындагы меш 234 миң сомго алмаштырылды.
Түрткү берүүчү (үлүштүк) грант аркылуу Түйтө айылындагы коомдук эски мончонун имаратын капиталдык оңдоп-түзөөдөн өткөрүүгө 3 млн 874 миң 945 сом, анын ичинен өздүк салым 874 миң 945 сом сарпталды.
Ынтымак жана Түйтө айылдарындагы ички инфраструктураны жакшыртуу үчүн Жогорку Кеңештин депутаты Русланбек Жакышов Кореянын «Бабсанг-Ентан Ынхенг» коомдук кайрымдуулук фонду менен сүйлөшүүлөрдү жүргүзгөн. Натыйжада аталган фонд тарабынан 8 млн 600 миң сом бөлүнүп, ички жолдун 11,5 чакырымы толугу менен оңдоодон өткөрүлдү.