Turmush — Президенттин Ош облусундагы ыйгарым укуктуу өкүлү Элчибек Жантаев Жалал-Абад шаарында өткөн «Кыргызстан менен Россиянын өнөр жай кооперацияларынын жаңы горизонттору» Кыргызстан-Россия аймактар аралык X мааракелик конференциясына катышты.
Президенттин облустагы өкүлчүлүгүнүн маалыматы боюнча, Элчибек Жантаев менен Иркутск облусунун (Россия Федерациясы) губернатору Игорь Кобзев эки облус ортосунда кызматташуу протоколуна кол коюшту. Бул эки аймактын ортосундагы мамилелерди орнотууда жана өнүктүрүүдө маанилүү кадам болуп саналат.
Мындан сырткары Ош облусунун башчысы Алтай аймагынын өкмөтүнүн төрагасынын орун басары Иван Кибардин менен жолугуп, мындан аркы кызматташуунун ар кыл аспектилери талкууланды. Тактап айтканда, экономикалык долбоорлорду ишке ашыруу, ошондой эле соода-экономикалык жана гуманитардык демилгелер боюнча суроолор көтөрүлдү.
«Бул жолугушуулар Ош облусунда инвестиция тартуу жана ири долбоорлорду ийгиликтүү ишке ашыруу боюнча аракеттерди күчөтүүнүн өзөгү болуп саналат. Аймактын өнүгүшүнө, анын экономикалык жана социалдык бакубаттуулугун жогорулатууга салым кошот», - деп айтылат маалыматта.