Turmush — Ош шаарындагы Кыргыз-Өзбек эл аралык университетинде Кыргызстандын жана Өзбекстандын жогорку окуу жайларынын ректорлорунун форуму өтөт. Бул тууралуу аталган окуу жайдан билдиришти.
Маалыматка караганда, Кыргыз Республикасы менен Өзбекстан Республикасынын ортосундагы дипломатиялык мамиленин 30 жылдыгына карата өткөрүлө турган иш-чаралардын алкагында 3-4-октябрь күндөрү тарыхый тамыры бир эки элдин ортосундагы бир туугандык мамилени өнүктүрүү максатында «Достук» ордендүү Б.Сыдыков атындагы Кыргыз-Өзбек эл аралык университетинин базасында эки өлкөнүн жогорку окуу жайларынын ректорлорунун биринчи эл аралык форуму уюштурулат.
Форумга Кыргызстандын жогорку окуу жайларынан 40 ректор, Өзбекстандын жогорку окуу жайларынан 40 жетекчи катышат. Мындан тышкары Кыргызстандын жана Өзбекстандын билим берүү жана илим министрлери, Кыргызстандын Өзбекстандагы толук ыйгарым укуктуу элчиси, Өзбекстандын Кыргызстандагы толук ыйгарым укуктуу элчиси, Кыргызстандын мамлекеттик катчысы катышары күтүлүүдө.
Эки күнгө созулган форумда эки өлкөнүн жогорку окуу жайларынын жетекчилери билим берүү, илим изилдөө жана башка багыттар боюнча эки тараптуу келишимдердин түзүлүшүнө мүмкүнчүлүк табышат.
