Turmush — Чүй облусунун Сокулук районуна караштуу Новопавловка айыл өкмөтү аз камсыз үй-бүлөлөргө бизнес баштоого каражат бөлдү.
Министрлер кабинетинин 2022-жылдын 15-июлундагы «Социалдык контракттын негизинде социалдык жардам берүү» токтомун ишке ашыруу боюнча өлкөнүн бардык аймактарында бизнес пландары жактырылган аз камсыз үй-бүлөлөргө 100 миӊ сомдун сертификаттары тапшырылган.
Айыл өкмөттүн маалыматы боюнча, 10 үй-бүлөгө 100 миң сомдун сертификаттары тапшырылды. Иш-чарага Сокулук районунун акими Илияз Ташкулов, айыл өкмөт башчысы Жалын Жумабеков, айылдык кеӊештин төрагасы Аскар Абышев жана мекеме-уюмдардын жетекчилери, өкүлдөрү катышты.
Айыл өкмөт башчысы Жалын Жумабековдун айтымында, бул долбоор өзүнүн оӊ натыйжасын берип, жумасына жакшы киреше тапкандар бар.
«Былтыр өкмөттөн 100 миӊ сомдук долбоорду биздин айыл аймактан 47 үй-бүлө утуп алган. Ал эми быйыл өкмөттүн демилгесин биз дагы колдоого алып, жергиликтүү бюджеттин эсебинен 10 адамга 100 000 сомдон бердик. Себеби былтыр социалдык келишим түзүп, жардам алган үй-бүлөлөрдүн көбү ишкерликти жолго салып, каражат таба баштаганын байкадык. Демек, бул долбоор өзүнүн натыйжасын берип жатат. Бул демилгени колдоону улантабыз», - деди ал.