Turmush — Чүй облусунун Аламүдүн районуна караштуу Пригородный айыл аймагынын Достук айылына таза суу тартылды. Бул тууралуу айыл өкмөттөн билдиришти.
Маалыматка ылайык, Достук айылы союз кезинде «Ленин» заводунун дачасы болгон. 2011-жылы айыл макамын алган. Айылда 1050 түтүн, 5 миңден ашык киши жашайт. Алардүн көбү 12 жылдан бери таза сууну ташып ичип келишкен. Айрымдары өз алдынча жер алдынан, 15-20 метр тереңдиктен суу чыгартып алышкан.
Таза суу демөөрчүлөр тарабынан чыгарылды. Ал үчүн 14,5 аралыкка суу түтүгү тартылып, суу мунарасы курулду.
Ачылыш аземине Пригородный айыл өкмөт башчысы Бакыт Шеримбеков, демөөрчүлөр, айыл тургундары, ошондой эле Бириккен Араб Эмираттарынын белгилүү ырчысы Мухаммад Ассаф катышты.
Иш-чарада демөөрчүлөр тарабынан айылдагы 100дөй балага мектепке кийим-кече, окуу-куралдары жана 50дөй үй-бүлөгө азык-түлүк таратылды.
Айыл өкмөттөн билдиришкендей, Достук айылындагы айыл өкмөткө караштуу муниципалдык жерге бала бакча, мектеп жана аз камсыз үй-бүлөлөр, мугалим жана дарыгерлерге 100дөй үй куруу боюнча долбоор даярдалган. Учурда бул долбоорду ишке ашыруу иштери жүрүп жатат.