Turmush — Жалал-Абад облусунун Базар-Коргон районуна караштуу Арстанбап айыл аймагында жайгашкан «Кыргызнефтегаз» ачык акционердик коомунун «Зорька» эс алуу жайында 300 орундуу 10 коттедж пайдаланууга берилди.
Жаңы курулган заманбап имаратка 300 бала кабыл алынып, учурда алар эс алып жатышат. Аталган жайдын абалы менен президенттин Жалал-Абад облусундагы ыйгарым укуктуу өкүлү Абсаттар Сыргабаев, «Кыргызнефтегаз» ААКтын жетекчиси Нургазы Нишанов жана аталган мекеменин директорлор кеңешинин төрагасы Тынарбек Мисиралиев таанышты.
«Кыргызнефтегаз» ААКтын профсоюз уюмунун төрагасы Акынбек Раимкуловдун айтымында, балдар эс алуучу жайдын имараттары 1964-жылдары курулган. Акыркы 10 жылдан бери балдар эс алган корпустарды жаңылоо боюнча маселе көтөрүлүп келген.
«Кезинде мындагы лагерде бир учурда 500 бала эс алчу. Бара-бара имараттар эскирип, 280дей баланы кабыл алып калганбыз. Акыркы жылдары дал ушул лагерди оңдоо боюнча жетекчиликке айтып келгенбиз. Былтыр 10 корпустун курулуш иши башталган, быйылкы жылы июнь айына толук бүткөрүлүп, балдар жаңы имаратка кабыл алынды. Коттедждердин ичинде жуунуучу жайы, ажатканасына чейин киргизилди. Заманбап шарт түзүү үчүн канализация маселеси жолго коюлду. Лагерь аймагында тротуарлар кошо салынды. Биз бул мүмкүнчүлүктү көп жылдан бери күтүп келгенбиз. Буюрса ишке ашырылды», - дейт ал.
Биринчи агымда эс алып жаткан балдардын майрамдык салтанатында «Кыргызнефтегаз» ААКтын жетекчиси Нургазы Нишанов балдар үчүн ар дайым камкордук болорун белгиледи. Анын айтымында, быйылкы жылы балдарды кабыл алуу токтогондон кийин дагы 10 коттедж куруу иштери башталат.
«Азыр 300 бала эс алып жатасыздар, дагы 10 коттедж салынса, бир учурда 600 бала эс алууга шарт түзүлөт. Ашканалар жаңыланат. Балдар эң сонун эс алып кетүүгө мындан ары да мүмкүнчүлүктөр түзүлөт», - деди ал.
Облус башчысы өлкөдөгү ири өндүрүштүк мекеме болгон «Кыргызнефтегаз» ишканасы өзүнүн экономикалык киреше бөлүгүн арттыруу менен гана чектелбей, аймактагы социалдык турмушта да өзүнүн активдүүлүгүн көрсөтүп келе жатканын белгиледи.
«Зорька» эс алуу жайы негизинен «Кыргызнефтегаз» ишканасында эмгектенген кызматкерлердин балдарынын жайкы эс алуусун уюштурууга багытталган. Бул жылы жалпы беш агымды кабыл алуу пландаштырылып жатат. Ошондой эле Кочкор-Ата шаардык мэриясы да балдарды эс алдыра алат. Келишимдин негизинде башка мекемелердин кызматкерлеринин балдары да кабыл алынат.
Мекеменин Арстанбаптагы кызматкерлери үчүн да эс алуучу жайы бар. Ал эми быйылкы жылы биринчи жолу кызматкерлер үчүн Чолпон-Ата шаарында жайгашкан «Нефтчи» эс алуу зонасы ачылды. Мында бир эле учурда 48 адам эс алууга ылайыкташкан.