Turmush — Ысык-Көл облусунда сүттүн баасына болгон нааразычылыктар байма-бай болуп келүүдө. Тургундар бааны жайкысын 35 сом, кышында 45 сомдон түшүрбөй, бир бааны карамап берүүсүн өтүнүшүүдө. Ал эми ишкерлер андай болсо, заводдор чыгымга учурарын айтып келишет.
Turmush басылмасынын кабарчысы тараптардын пикирин укту.
Учурда Ысык-Көлдө сүт 23-25 сомдон алынып жатат. Тургундардын айтымында, бул баа уй багуудагы чыгымдарды актабайт. Ал эми заводдон алыс жайгашкан айылдардын тургундары сүттү башка жакта литрин 25 сомдон алышса, аларда 21 сомдон алып, жолго кеткен чыгымды да сүт алуучулар калктын жонунан чыгарып алышарын айтып, нааразы болушат.
«Биздин облус сүт долбооруна кирип, уй баксаңар эле байып кетесиңер болуп калган. Элдин баары уй алды. Жыйынтыгында ага кеткен чыгымды актабай жатат. Мисалы, бир уйду жайында талаага чыгарып бактырганга бир айга 500 сом төлөйбүз. Талаадан келгенде эле сүт жакшы чыкпайт да, үйдөн чөп беребиз. Кечинде келгенде чөп берип, айына 2000 сомго чейин кетет. Жемдин мүшөгү 1000 сомго чейин болот. Бир айда 4 кап жем жейт. Ошондо 4000 сом. Бул жайкысын талаага чыкканда кетчү чыгым. Эми эсептеп көргүлө, кымбатчылык күчөп турган учурда бир литр суу алып ичсең 30 сом. Ал эми сүт 25 сомго бааланат. Завод биздин сүттү дүкөндөргө 100 сомго чейин сатып жатат. Биздин эмгек бааланышы керек. Айылда иш жок, сүттүн акчасын күтүп отурабыз. Анан бизден 25 сомдон алып, заводго 30 сомдон өткөрүшөт экен. Сүт ташыган айдоочулар элдин эсебинен ар бир литр сүт үчүн 5 сомдон алып жатат. Ошол акчаны айдоочуларга завод өзү төлөп, жайында 30, кышында 45 сомдон туруктуу баа кылып беришсин», - дейт Жети-Өгүз районун тургуну Айдай Турсумбаева.
Буга чейин Ысык-Көлдө сүт өндүрүүчүлөр баанын туруктуу болбой жаткандыгына нааразы болушкан. Сүткө болгон баанын түшүшүнө эл менен сүт заводунун ортосундагы сүт алуучуларды күнөөлөшкөн. Нааразычылыктардан кийин сүт өндүрүүчүлөр жана сүт заводдун ортосунда иш алып баргандар менен 22-май күнү президенттин Ысык-Көл облусундагы ыйгарым укуктуу өкүлчүлүгүнүн аппарат жетекчиси Данияр Арпачиев жолуккан.
2023-жылдын 28-мартында Жети-Өгүз, Түп, Ак-Суу жана Ысык-Көл районунан келген фермерлер сүттүн баасынын түшүп кетишине нааразы болуп, президенттин Ысык-Көл облусундагы өкүлчүлүгүнө келишкен.
4 райондон 200дөн ашык сүт өндүрүүчүлөр келген. Алар менен президенттин Ысык-Көл облусундагы ыйгарым укуктуу өкүлүнүн биринчи орун басары Улан Далиев, монополияга каршы жөнгө салуу кызматынын облустагы бөлүмүнүн жетекчиси Данияр Үсөнов жолугушкан.
2023-жылдын 13-апрелинде Талас шаарында ондогон адамдар президенттин Талас облусундагы ыйгарым укуктуу өкүлчүлүгүнүн имаратынын алдында чогулушкан. Алардын көбү аял кишилер болгон.
Топтолгондор сүт маселеси менен өлкө жетекчилигине кайрылышкан.
«Мал баккан деле оңой иш эмес, ден соолукту алат. Мамлекеттен 1 сом албай, «уюң бар» деп жөлөк пулга дагы илинбей жашап келебиз. Биз сүттүн 1 литри 3 сом болгон учурда дагы унчукпай төгүп, ошол акчага жашап келгенбиз. 5 сом болгондо дагы жашоо жакшы болчу. Эми минтип 2 жылдан бери кыйналып жатабыз. Дүкөндө эртең менен бир баа, түштөн кийин бир баа болот. Бардыгы күндөн-күнгө кымбат.
Учурда 1 литр сүттүн баасы 25 сом. Ал эми 1 литр суунун баасы 30 сом. Биз ушунча ыйлай турган абалда турабыз. Бул жакта акимге кайрылсаң, «губернаторго бар» дейт. Ага барсаң «сүт заводу» дейт. Алар болсо керсейип, элдин үстүнөн акча тапкандан башка иши деле жок. Өзүбүз сүт өткөрүп, кайра дүкөндөн сүт азыктары кымбат болгонунан сатып жей албайбыз», - деген алар.
Макаланын уландысын жана башка бардык маалыматтарды окуу үчүн АКИpress'ке катталыңыз...
