Turmush — Бүгүн, 1-июнда Б.Сыдыков атындагы Кыргыз-Өзбек эл аралык университетинин чоң жыйындар залында Ош шаардык кеңешинин депутаты, жаш калемгер Назима Алмазбек кызынын «Жаз дүйнө» аттуу ырлар жыйнагынын бет ачар аземи КӨЭАУнун «Достук» чыгармачыл жаштар борборунун коштоосунда өттү.
Назима Алмазбек кызынын тунгуч китебинин бет ачарын жергиликтүү өнөрпоздор обондуу ырлар менен көркүнө чыгарды. Жаш акындын жыйнагы боюнча улуттук жазуучулар союзунун мүчөсү, акын, жазуучу Зинакан Пасаңова баяндама жасады.
Аталган аземге Жогорку Кеңештин депутаты Шайлообек Атазов, Ош шаардык кеңешинин төрагасы Салман Назылбеков, Ош шаарынын мэринин орун басарлары Нурбек Кадыров жана Сонунбек Жунусбаев, Ош шаардык кеңешинин депутаттары, КӨЭАУнун ректору, профессор Чаткалбай Райымбаев баштаган профессордук-окуутуучулар жамааты, студенттер, акындын туугандары, санаалаштары катышып, Алмазбек кызынын чыгармачылык жолуна ийгилик каалашты.
Ошону менен бирге КӨЭАУнун жаш таланттарына ыраазычылык билдиришти. Кеченин соңунда жергиликтүү бийликтин өкүлдөрү, ЖК депутаты Шайлообек Атазов жана шаардык кеңештин депутаттары, окуу жайдын жетекчилиги жаш калемгерге белектерин тапшырып, кечени жыйынтыкташты.