Turmush — Талас облусундагы күрөш залдарына «Альянс Алтын» компаниясы Улуттук олимпиада комитети менен биргеликте күрөш килемдерин (мат) тапшырды. Бул тууралуу компаниянын коомчулук менен байланыш бөлүмүнүн башчысы Кынатбек Сарчаев билдирди.
«Альянс Алтын» компаниясы КРдин Улуттук олимпиада комитети менен келишим түзгөн.
«Ал келишимдин негизинде Талас облусундагы спорттук иш-чараларга, спорт имараттарынын оңдоо иштерине, спортчуларга демөөрчүлүк кылып келебиз. Бул ирет облустагы төрт райондун бирден күрөш залына олимпиадалык стандарттагы маттарды алып бердик. Биздин жаш спортчулар келечекте жакшы жетишкендиктерге жетерине ишенебиз», - деди ал.
КРдин Улуттук олимпиада комитетинин өкүлү Марат Аскарбеков компаниянын мындай колдоосу Талас облусундагы жаш муундун спорт менен жакын болушуна жакшы жардам болгонун баса белгилеп, колдоосу үчүн ыраазычылыгын билдирди.
Ал эми машыктыруучулар менен күрөш залындагы жаш спортчулар жаңы күрөш килемдер үчүн кубанычын жашырышкан жок. Алардын бири Кууганды айыл аймагындагы күрөш залынын машыктыруучусу Кылычбек Курманалиев буга чейинки күрөш килемдери эскилиги жетип калганда, жаңы килемдердин келиши алар үчүн чоң жардам болгонун айтты.
Күрөш килемдер тапшырылган ар бир залда 100гө жакын жаш спортчулар тарбияланып келишет. Алардын айрымдары өспүрүмдөр арасында республиканын чемпиондору болушкан.
