Turmush — Ош облусунун Араван районунда колунда бар адамдар, мамлекеттик кызматтын жетекчилери атасыз жана аз камсыз болгон үй-бүлөдөгү балдарды өз камкордугуна алып жатышат. Бул тууралуу Алля Анаров айыл өкмөтүнүн башчысы Мамиржан Кадиров билдирди.
Анын айтымында, Алля Анаров айыл өкмөтүндө атасыз чоңоюп жаткан 123 бала бар экени аныкталды. Араван районунун акими, райондун прокурору бештен баланы өз камкордугуна алды.
«Өзүңөргө белгилүү болгондой, бүгүнкү күндө ар бир мектепте балдарыбыз сабактан кийин дүкөндөргө чуркап барышат. Кээ бир балдар ошол жерде токтоп калат. Айрым балдарды карасак жаңы кийим, жаңы бут кийим, кээ бир балдар мурдагы жылдагы бут кийимдер менен жүрүшөт. Биз ал балдардын өздүгүн тактап, талдап чыктык. Алар атасы кайтыш болгон же атасы таштап кеткен балдар экен.
Бүгүнкү күндө Алля Анаров айыл өкмөтүндө жашоо шарты оор үй-бүлөдө жашаган, атасыз тарбияланып жаткан 123 баланы тактадык. Урматтуу эркектер, келгиле, аталган балдарды чогуу камкордукка алалы. Бир баланын бир жылдык чыгымы 20 миң сомго жетпеген акча экен. Жазгы, күзгү, кышкы кийимдерине, окуу куралдарына жылына 3 миң 600 сом кетет.
Мен өзүм 5 баланы камкордукка алдым. Дагы бир инибиз 5 баланы, депутат инибиз 3 баланы камкордукка алды. Араван районун акими Сейтек Кулубаев да балдарды камкордукка алды. Бүгүнкү күндө 25 бала камкордукка алынды», - дейт айыл өкмөт башчы.