Turmush — Түп райондук соту 16 жашка толо элек кызга сексуалдык мүнөздөгү аракеттерди жасоо жана зордуктоого айыпталган тургундун кылмыш ишин карап, өкүм кабыл алган. Өкүм 2023-жылдын 2-февралында чыккан.
Адылбек (аты өзгөртүлдү) 1974-жылы Ысык-Көл облусунун Түп районунда туулган, билими орто, ажырашкан, эч жерде иштебейт, мурда сот жообуна тартылган.
Тергөө органдарынын маалыматына караганда, Адылбек 2008-жылы туулган Гүлайым (аты өзгөртүлдү) менен телефон менен таанышып, 2022-жылдын сентябрь айында Каракол шаарында жолуккан. Ал жерден жабырлануучунун окуучу кыз экенин билип туруп, аны зордуктап, андан кийин кетип калган.
Мындан сырткары, Адылбек Түп районундагы айылдардын биринде, өзү жашаган үйдө Гүлайым менен бир нече жолу жыныстык катнашта болгон.
Соттук отурумда айыпталуучу Адылбек күнөөсүн толугу менен мойнуна албай, буларды көрсөттү. 2022-жылдын сентябрь айынын башында түгөй табуу боюнча интернет сайтка кирип, ал жерге телефон номурун таштап койгон. Андан кийин ага бир кыз телефон чалган. Экөө таанышып, 1-2 күн сүйлөшкөн. Гүлайым аны жолугушууга чакырган. Адылбек макул болуп, аны менен айылдагы көпүрөдө жолуккан. Айыпталуучу Гүлайым менен беш мүнөттөй сүйлөшкөндөн кийин жабырлануучу кетип калган. Арадан бир жума өткөндөн кийин, сентябрь айынын орто ченинде жабырлануучу кайрадан телефон чалып, аны Каракол шаарына чакырган. Айыпталуучу макул болуп, айылдан Каракол шаарына барган. Бирок, Гүлайым дарегин жакшы түшүндүрө албагандыктан, Адылбек кайра үйүнө кетип калган. Арадан 2-3 күн өткөндөн кийин Гүлайым кайра телефон чалып: «Каракол шаарына келбейсиңби» деп айткан. Айыпталуучу макул болуп, Каракол шаарына, жабырлануучу айткан дарекке барган. Айыпталуучу андан эмнеге чакыргандыгын сураганда, Гүлайым чечинип: «Жыныстык катнашта болобуз» деген. Айыпталуучу макул болуп, жабырлануучу менен жыныстык катнашта болуп, андан соң үйүнө кетип калган.
Алдылбек билдиргендей, бул окуядан кийин экөө айылдан жолугуп, айыпталуучунун үйүндө бир нече жолу жыныстык катнашта болушкан. Бул ишке жабырлануучу өз каалоосу менен барган.
Жабырлануучу Гүлайым сотто буларды көрсөттү. 2022-жылдын сентябрь айынын башында таанышуу боюнча интернет сайтына кирип, Адылбектин телефон номурун алган. Аны менен 2-3 күн сүйлөшкөндөн кийин Ак-Суу районундагы айылда көпүрөдө жолугушкан. Аны менен беш мүнөттөй сүйлөшкөндөн кийин «сен мага жаккан жоксуң» (жабырлануучу) деп кетип калган. Андан кийин Адылбек менен телефон аркылуу сүйлөшүп жүрүп, сентябрь айынын орто ченинде, атасы жумушка кеткенде, аны Каракол шаарындагы батирге чакырган.
Айыпталуучу саат 11:00 чамасында келип, экөө диванда сүйлөшүп отурган. Ошол учурда айыпталуучу анын колунан кармап, күч колдонуп зордуктаган. Андан кийин айыпталуучу кетип калган. Жабырлануучу окуя тууралуу эч кимге айткан эмес.
2022-жылдын 4-октябрь күнү Гүлайым айыпталуучуга телефон чалып: «Мен такси менен үйүңүзгө бара жатам, тосуп алыңыз» деп айткан. Адылбек макул болуп жолдон тосуп алып, таксистке 550 сом берген.
Карыган атасы менен бирге жашаган Адылбектин үйүнө барып, экөө чай ичишкен. Кечинде Гүлайым өзүнүн каалоосу менен жыныстык катнашта болушкан.
Гүлайым белгилегендей, мындай кийинки жыныстык катнаштар өзүнүн каалоосу менен болуп келген. Адылбектин үйүнө 3-4 жолу барган.
Жыйынтыгында Адылбек Кылмыш-жаза кодексинин 154-беренесинин 3-бөлүмүнүн 2-пункту (зордуктоо) жана 157-беренеси (он алты жашка толо элек бала менен сексуалдык мүнөздөгү аракеттер) менен күнөөлүү деп табылып, жалпы 14 жылга эркиндигинен ажыратылды.
Өкүмгө нааразы тарап 30 сутканын ичинде Ысык-Көл облустук сотко апелляциялык тартипте сунуш же даттануу келтирүүгө укуктуу.
Макаланын уландысын жана башка бардык маалыматтарды окуу үчүн АКИpress'ке катталыңыз...
Новости на кыргызском языке в сети Х — подпишись!