Turmush — Талас шаарынын 13 жаштагы тургуну Байэл Айылчиев 3 жылдан бери чабандес болуп, ийгиликтерди багындырып келет. Аймактык кабарчы аны менен таанышты.
Өзүнүн айтымында, учурда 6-класста окуп жатат.
«Сабактан сырткары ишемби, жекшемби күндөрү айылга барып ат чаап машыгып келем. Негизи биздин үйдө баарыбыз ат чабабыз. Атам дагы ат чабат. Ат чапканга кызыгуума атам түрткү болгон. Атамдын жанында жүрүп эле кызыгып баштагам. Кызыгуум күчөп калганын байкаган атам мени акырындык менен ат чапканга үйрөтүп баштаган. Атам Самат менин ар бир ийгилигиме сыймыктанып, колдоп жүрөт. Кайсы ат чабышка барбайын атам сөзсүз жанымда жүрөт. Мен ат чаап баштаганда акыл-насаатын айтып, көзөмөлдөп турат.
9 жашымдан баштап ат чаап келе жатам. Эң алгачкы чабышымда эле 2-орунга ээ болгом. Ат чабыш Талас районунун Көк-Ой айылында өткөрүлгөн. Андан кийин Бакай-Ата районунун Маданият айылындагы өткөрүлгөн ат чабышта 1-орунга ээ болгом. Бишкек шаарында өткөрүлгөн чабышта 54 күлүктүн арасынан 7-орунга илингем. Көп өтпөй эле Казарманда өткөрүлгөн байгеде кунан чабып унаа утуп келгем. Каркыра жайлоосунда Түгөлбай Сыдыкбековдун 110 жылдыгына арналган ат чабышта биринчи келип президент Садыр Жапаровдун колунан алган медалым баарынан баалуу болгон.
Эң эсте калган күнүм Казакстанга барып Костонайга учак менен учуп, 1-орунга ээ болуп келгеним. Мен ат чабышка атайын деле даярдык көрбөйм. Көбүнчө байгелерде өзүбүздүн аттарды чабам. Эгер биздин аттар оюнга даярдыгы жок болсо тааныш байкелердин аттарын чабып берем. Мен аттын үстүнөн сезем. Эгер минип бараткан аттын күчү жок болсо токтотуп коём. Ар бир аттын мүнөзү ар кандай. Эң негизгиси аттан коркпош керек. Ат дагы сезет ошол үчүн адамда кандайдыр бир дух болуш керек», - деди ал.
Чабандестин атасы Самат мырза уулу Байэл менен сыймыктанарын айтты.
«Биз үй-бүлөбүз менен атка кызыгып, көп жылдан бери ат чаап келе жатабыз. Уулум Байэлдинда атка болгон кызыгуусу күчөп, ат чаап баштаган. Анын ар бир ийгилигине сыймыктанам. Жаш болсо дагы чоң байгелерге ээ болуп келе жатат. Өзү айткандай кайсы ат чабыш болбосун жанында сөзсүз мен кошо жүрөм. Балам азыр жаш, көзөмөл керек. Ошондой эле акыл-насаатымды, мелдештин шарттарын түшүндүрүп жанында жүрөм. Эми келечекте кайсы жолду тандайт ал өзүнүн чечими. Кандай болбосун апасы экөөбүз колдойбуз. 2022-жылдын жыйынтыгы менен «Жылдын мыкты чабандеси» наамы менен сыйланды», - деди ал.
Маалыматтын жабык бөлүгүндө чабандестин атасынын номери бар.