Бөлүмдөр
Дүйшөмбү, 14-октябрь
Баткен облусу 22.02.2014 15:53

К.Асанов чек ара чыр-чатактары эч кандай курал колдонуусуз жана провокацияга алдырбастан чечилиши керектигин белгиледи

Turmush -  КР ички иштер министринин орун басары милициянын генерал-майору К.Асанов баштаган укук коргоо органдарынын өкүлдөрү Баткен районунун Жака-Өрүк айылы менен чектешкен жеринде Тажикстандын тиешелүү укук коргоо органдарынын жетекчилери менен жолугушту.

Баткен ОИИБ басма сөз кызматы маалымдагандай, жолугушууда азыркы учурдагы абал, кыргыз-тажик мамилелери, кыргыз-тажик милиция кызматкерлеринин биргелешкен күзөттөрү жана эл арасындагы ушак-айыңдарды жокко чыгаруу тууралуу сөз болуп, чагымчыл жана мыйзамсыз иш-аракеттерди аныктап, аларга бөгөт коюу маселелери көтөрүлдү.

Сүйлөшүү учурунда ички иштер министринин орун басары милициянын генерал-майору К.Асанов бүгүнкү күндөгү чек арадагы абал президент Алмазбек Атамбаевдин жана өкмөт башчысы Жантөрө Сатыбалдиевдин көзөмөлүндө экендигин, өлкө жетекчилери кайсы гана кошуна мамлекеттер болбосун алардын ортосундагы чек ара тынчтык жана дипломатиялык жол менен куралдуу күчтөрдүн катыштыгысыз, эч кандай провокациялык күчтөргө алдырбастан чечилүүсү керектигин билдиришет, деп айтты.

Кылымдар бою тыгыз карым-катнашта жашап келген тажик жана кыргыз эли ортосунда кан төгүлсө же аракет кылса, мындай кадамды тарых кечирбестиги К.Асанов тарабынан баса белгиленди.

Андан кийин Тажикстандын президентинин коргонуу жана коопсуздук маселелери боюнча кеңешчиси, генерал-полковник Ш.Хайруллоев өз сөзүндө, Тажик президенти Эмомали Рахмон баш болгон жетекчилиги да тез аранын ичинде кыргыз-тажик мамилелеринин өз нугуна түшүшүнө кызыкдар экендигин жана эч кандай провокациялык жолдогорго алдырбастан эки элдин ынтымагы баарынан жогору экендигин, орчундуу маселе болгон чек ара маселеси бир гана сүйлөшүү жолу менен гана чечилерин белгиледи.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×