Turmush — Министрлер кабинетинин төрагасы Акылбек Жапаров ОшМУнун медициналык клиникасындагы хирургия бөлүмүнүн жана операция жасоочу блогунун ачылышына катышты. Бул тууралуу окуу жайдын басма сөз кызматы билдирди.
Окуу жайдын медициналык клиникасынын операциялык блогунда мындан ары операциялардын бардык түрү, онкологиялык оорулар үчүн да операциялар жасалат. Бөлүм акыркы заманбап үлгүдөгү техникалар менен жабдылган. 2022-жылдын декабрында клиника үчүн окуу жай тез жардам унаасын да сатып алган.
Учурда ОшМУнун медициналык клиникасында 4 бөлүм кызмат көрсөтөт. Амбулатордук диагностикалык бөлүмдө 2021-жылы 13292 бейтап кароодон өткөн болсо, 2022-жылы 29 миңге жакын мугалим, студенттер жана бейтаптар, медициналык кароодон өткөн. Терапия бөлүмүндө 10 күндүк стационардык дарыланууда 1500 бейтап дарыланган. 2022-жылдын октябрь айында ачылган стоматология бөлүмүнө 512 бейтап кайрылган.
Иш сапардын алкагында делегация окуу жайдын эл аралык медицина факультетиндеги DIMEDUS виртуалдык клииникасы, морфологиялык корпусу, анатомиялык илимий музейи жана лекциялык залдары менен таанышып, илимий долбоорлордун көргөзмөсү, санарип платформанын университетте ишке ашуусу, ОшМУнун «Жаштар бизнес паркынын» стартап долбоорун көрдү.
Министрлер кабинетинин төрагасы иш сапарынын соңунда ОшМУнун окумуштуулар кеңеши менен жолугушту.