Чек ара кызматындагы мурунку жетекчилердин кармалышы: Аскер прокуратурасы Жогорку сотко кайрылды

Turmush — Ош облустук аскердик прокуратурасы Жогорку сотко Улуттук коопсуздук мамлекеттик комитетинин Чек ара кызматындагы мурунку жетекчилердин кылмыш иши боюнча кайрылды.

• «Достук-унаа жолу» көзөмөл-өткөрүү пунктунун мурунку жетекчиси Аскарбек Эрмекбаев, Чек ара кызматынын Ош облусу боюнча башкармалыгынын мурунку башчысы Чынарбек Насиев, Чек ара кызматынын Башкы штабынын жетекчиси — Чек ара кызматынын башчысынын мурунуку биринчи орун басары Курсанбек Бекташовдун кылмыш иштери тууралуу сөз болуп жатат.

2021-жылы 20-октябрда УКМКнын басма сөз кызматы Чек ара кызматындагы жетекчилердин кармалышы боюнча видео тараткан.

Атайын кызматтын маалыматы боюнча, «Достук-унаа жолу» көзөмөл-өткөрүү пунктунун жооптуу кызматкерлери Чек ара кызматынын айрым жетекчилеринин колдоосу менен чек арадан өткөн жарандардан акча талап кылган. Алар Өзбекстандын жарандарынан жана оор жүк ташуучу унаалардын айдоочуларынан акча талап кылышкан.

Бул факт Жазык кодексинин 325-беренесинин 3-бөлүгүнүн 2-пункту (алдын ала сүйлөшүү боюнча адамдардын тобу тарабынан пара алуу) менен катталган.

Жыйынтыгында 19-октябрда «Достук-унаа жолу» көзөмөл-өткөрүү пунктунун жетекчиси Аскарбек Эрмекбаев, Чек ара кызматынын Ош облусу боюнча башкармалыгынын башчысы Чынарбек Насиев, Чек ара кызматынын Башкы штабынын жетекчиси — Чек ара кызматынын башчысынын биринчи орун басары Курсанбек Бекташов кармалган.

Алар УКМКнын Ош шаары жана Ош облусу боюнча убактылуу кармоочу жайына киргизилген. Ал эми 2022-жылдын 9-февралынан тарта үй камакта болушту.

Тергөө органдарынын маалыматы боюнча, Бекташов 2021-жылдын март айында 2024-аскер бөлүгүндөгү «Достук-унаа жолу» көзөмөл-өткөрүү пунктунун башчысын Бишкек шаарына чакырып, эгер кызмат ордунда калгысы келсе, анда ага ай сайын 1000 доллар бериши керек экенин айткан. Материалдарда айтылгандай, Бекташов андан 500 доллар алган.

Мындан тышкары тергөө органдарынын маалыматы боюнча, Бекташов 2021-жылдын август айында WhatsApp аркылуу «Достук-унаа жолу» постунун 2-нөөмөт бөлүмүнүн башчысы, милициянын майору Ш.З. менен сүйлөшүүнүн жүрүшүндө чек ара кызматынын аскер кызматкерлери жүк ташуучу унааларды өткөрүп, опузалоо (мыйзамсыз акча чогултуу) менен алектенип жатышканын айткан. Ал бул кылмышты жабуу үчүн ай сайын жүк ташуучу унаалардын айдоочуларынан мыйзамсыз жыйымдардан түшкөн каражаттын бир бөлүгүн берүүнү сунуштаган. Ошол эле учурда милициянын майору Ш.З. буга макул болбосо, анда бул аскер кызматкерлерин башка ишке которуп, ал тургай иштен бошотулат деп коркуткан. Ш.З. жана нөөмөттүн башчысы аргасыздан макул болуп, 40 миң сом жыйнап беришкен. Бул каражат Бишкек—Ош каттамында жүргөн айдоочу аркылуу которулган.

Андан ары материалдарда айтылгандай, 2021-жылдын сентябрь айында Бекташов кайрадан майор Ш.З. менен телефон аркылуу байланышып, алар «үлүш» деп атаган суммадан тышкары 2024-аскер бөлүгүнүн башчысы Ч.Н. [Чынарбек Насиев] 70 миң сом которушу керектигин айткан. Ш.З. мындай сунушка макул болбогонуна байланыштуу «Ош» аэропортунун көзөмөл-өткөрүү пунктуна башка кызматка которулган. Тергөө органдары «Достук-унаа жолу» көзөмөл-өткөрүү пунктунун башчысы өзүнүн «үлүшүнөн» 50 миң сом алган деп да шектенишүүдө. Каражат аскер кызматкери Баяман Жанибеков аркылуу которулган. Бул каражаттардын бир бөлүгү 2021-жылдын сентябрынын аягында башка адамга «үлүш» түрүндө которулган.

Сотто Бекташов, Насиев жана Эрмекбаев күнөөлөрүн мойнуна алган эмес.

Ош шаардык сотунун 2022-жылдын 29-июнундагы өкүмү менен:

- Курсанбек Бекташов Жазык кодексинин 43-берененин 2-бөлүгү, 319-беренесинин 1-бөлүгү (2017-жылдагы редакция, коррупцияны уюштуруу) боюнча күнөөлүү деп табылып, 3 жылга Чек ара кызматында кызмат ордун ээлөө укугунан ажыратуу менен 11 жылга эркиндигинен ажыратылган. Жаза өтөө мөөнөтү 2021-жылдын 20-октябрынан тарта эсептелет.

- Чынарбек Насиев Жазык кодексинин 42-беренесинин 1-бөлүгү (кылмышты аткаруучулук), 319-беренесинин 1-бөлүгү (коррупция) менен күнөөлүү деп табылып, 3 жылга Чек ара кызматында кызматтык ордун ээлөө укугунан ажыратуу менен 10 жылга эркиндигинен ажыратылган. Жаза өтөө мөөнөтү 2021-жылдын 20-октябрынан тарта эсептелинет.

- Аскарбек Эрмекбаев Жазык кодексинин 42-беренесинин 1-бөлүгү (кылмышты аткаруучулук), 319-беренесинин 1-бөлүгү (коррупция) менен күнөөлүү деп табылып, Чек ара кызматында кызматтык ордун ээлөө укугунан ажыратуу менен 12 жылга эркиндигинен ажыратылган. Жаза өтөө мөөнөтү 2021-жылдын 20-октябрынан тарта эсептелинет.

Ош облустук сотунун 2022-жылдын 31-октябрындагы аныктамасы менен Ош шаарындык сотунун 2022-жылдын 29-июлунда Бекташов, Насиев жана Эрмекбаевге карата чыгарылган өкүмү жокко чыгарылды. Иш Аскер прокуратурасынын Ош гарнизонуна тергөө аракеттерин жүргүзүү жана жаңы айыптоо актысын түзүү үчүн жөнөтүлдү.

Жогорку сотко Ош облустук аскердик прокуратурасынын мамлекеттик айыптоочусу Б.Сулаймановдун кассациялык сунуштамасы берилген. Ал Ош облустук сотунун 2022-жылдын 31-октябрындагы аныктамасын жокко чыгарып, ошол эле сотко (Ош облустук соту) кайра кароо үчүн жөнөтүүнү суранган.