Turmush — Жалал-Абад облусунун Сузак районуна караштуу Ырыс айыл аймагында бир жылдын ичинде 4 скважина курулуп, айыл элинин таза сууга болгон муктаждыгы жоюлуп, ондогон гектар жерге суу жетти.
Ырыс айыл өкмөтүнүн башчысы Таалайбек Халиловдун айтымында, ошондой эле республикалык жана жергиликтүү бюджеттен 6 чакырымга жакын жолго асфальт төшөлдү.
«Биздин айыл аймак негизинен 13 айылдан турат. Элеттин жолдорун асфальттоо, шагыл төшөө, оңдоо үчүн бар күчүбүзгө, бюджетибизге жараша аракет жасап жатабыз. Жыл башында эл менен жолугушуп, жашоочулардын сунуштары эске алынып, планга түшөт. Быйыл өзүбүздүн бюджеттен Масадан айылындагы Нишанов, Арал-Сай айылындагы Абидов, Ташбаев, Ю.Сарбаева, Ладан-Кара айылындагы Саидахмедов, Ырыс айылындагы Парпиев көчөлөрүнө 200 метрден 900 метрге чейин асфальт төшөлдү. Жалпылап алганда 3 чакырымга жакын жолду оңдоп бүтүрдүк. Ал эми Жогорку Кенештин депутаттарынын салымы менен республикалык бюджеттин эсебинен Күмүш-Азиз айылындагы 2 чакырым, Дөмөр айылындагы 1 чакырым жолго асфальт төшөлдү», - дейт ал.
Аталган айыл аймакта жер астынан суу чыгаруу кадамынын жыйынтыгында бир нече гектарлаган жер сугат жерге айланды. Тактап айтканда, Жар-Кыштак, Курук-Кол, Арал-Сай айылдарында скважина казылып, эл ичүүчү да, сугат суу менен да камсыз болду.
«Арал-Сай айылынын эли жана ошол айылдагы фермердин демөөрчүлүгү менен жер алдынан суу тартып чыгуу үчүн 2,6 миллион сомго скважина курулду. Эл негизинен казуу иштерине көмөктөштү. Курук-Кол айылында скважина районду өнүктүрүү фондунан каржыланды. Район акиминин колдоосу менен чоң айылдын элинин маселеси чечилди. Жар-Кыштак айылына скважина куруу иши арап фонддорунун колдоосу менен жүзөгө ашты. Бул үчүн 2 миллион сомдон ашуун акча каражаты жумшалды. Элеттиктердин үйлөрүнө чейин суу кирди. Ичүүчү сууга, сугат сууга болгон муктаждык бир топ жеңилдеди», - деп белгиледи айыл өкмөт башчы.
Айыл аймакта заманбап шартта жалпы сметалык баасы 45 миллион сомду чапчыган спорт комплекс да курулуп жатат. Сузак өнүктүрүү фонду тарабынан акчалай колдоо көрсөтүлдү. Жалпы 16 миллион сом акча каражаты чечилсе, толүк бүткөрүлөт. Бул боюнча алар облустук өнүктүрүү фондуна кайрылышкан. Келээрки жылы пайдаланууга берүү пландалууда.
Өнөр жай тармагын колдоо багытында Сары-Булак участкасынан 13 гектар жер бөлүнгөн. Ал жердин 3 гектары логистикалык борборго берилип, быйыл сүрдүрүү иши жүрдү. 2 гектар жери сүттү кайра иштетүүчү заводго берилген. Бул заводдун курулушу дээрлик бүтүп калды.
«Сүт завод ишке кирсе, биздин жашоочулар жумуш менен камсыз болушат. Сүтүн сата албай келген фермерлер бул маселеге баш оорутпай калышат», - дейт Таалайбек Халилов.
«Жашыл мурас» улуттук өнөктүк алкагында аймакта көрктөндүрүү жумуштарынын алкагында Курманбек аркасына кошумча арчалар отургузулуп, тамчылатып суугаруу жолго коюлган.
35 жылдан бери курулушу бүтө элек Фуркат мектебинде иш кайрадан жанданды. Жашасын айылындагы 540 орундуу мектепте 61 миллион сомго капиталдык оңдоп-түзөө жумуштары жүрүп жатат.
- Ырыс айыл аймагында калктын саны 45 миң адамга жетет.