Turmush — Нарын облусунун Ак-Талаа районундагы «Тайлак баатыр» балдар-өспүрүмдөр спорт мектебинин директору болуп Улан Доктурбек уулу дайындалды. Бул тууралуу аймактык кабарчы билдирди.
Аталган спорт мектебин буга чейин жетектеп келген Билимбек Капарбеков Спорттун олимпиадалык түрлөрү боюнча дирекциясынын эркин күрөш боюнча өспүрүм кыздардын улук машыктыруучусу болуп дайындалгандыгына байланыштуу өз каалоосу менен арыз жазып, кызматын тапшырган.
Ал эми Улан Доктурбек уулу буга чейин райондун спорт инструктору болуп иштеп келген.
Кечээ, 20-сентябрда Нарын облустук дене тарбия, спорт жана жаштар иштери башкармалыгынын башчысы Кубанычбек Чымылдаков жана облустун спорт инструктору Үсөн Айдаров жаңы дайындалган директорду эмгек жамаатка тааныштырып, кызмат ордуна отургузушту.