Turmush — Бүгүн, 8-сентябрда АКИпресс-Ошто өткөн маалымат жыйынга Өзгөн районундагы Куршаб айыл өкмөтүнүн тургундары чогулду.
Алар министрлер кабинетинин төрагасы Акылбек Жапаров кол койгон токтом боюнча билдирүү жасады. Жашоочулардын айтымында, токтомдо көрсөтүлгөн 70 гектар жер элдин үлүш жерлери болуп эсептелет. Бирок Өзгөн районунун акими үлүш жерлерди элге жер тилке кылып берүүнү көздөп жатат.
Куршаб айылынын тургуну Болотбек Каримов буларга токтолду.
«Айыл чарба жерлерин мамлекеттик фондунун жери деп туруп, үлүш жерлерибизди контурларын коюп, чекке бөлүп берип жиберип жатат. Мына ушунун кесепети бүгүнкү күндө башталды. Кандай болбосун турак жайга бөлүп таштоо аракеттери болууда. Токтомдо айыл чарба жерлери мамлекеттин фондунун жери деп, контур үлүш жерлердин ичинен көрсөтүлгөн. Арызданып, арызыбызга жооп ала албай жатабыз. Президентке кайрылдык, Акылбек Жапаровдун өзүнө кат жөнөттүк. Жыйынтык болгон жок. Бул жасалма токтом, мыйзамсыз, туура эмес. 1997-жылы жердин күбөлүктөрү каттоодон өткөн. Кайрак жер деп мамлекет элге бөлүп берген. Бул күбөлүктөрдү жокко чыгаруу үчүн соттун чечими болуш керек. Ошондо гана мамлекетке өтөт. Андай документтер эч жерде жок», - деди ал.
Куршаб айыл өкмөтүнүн дагы бир жашоочусу Акылбек Мусаевдин айтымында, үлүш жерлерин алдырып коюу коркунучунда турган жарандардын арызын бир дагы бийлик өкүлдөрү карабай койду. Арыздар каттоого алынган эмес.
«19-август күнү арыз менен акимчиликке бардык. 14 киши кирип, колуна арызды бердик. Ушул күнгө чейин натыйжа жок. 3-4 күндөн кийин барсак, ал арыз жок, катталбаптыр дагы. Аким «үлүш жерин бербегендер кала берсин, бергендердикин чекке бере бергиле» деп буйрук бериптир. Бул канчалык мыйзамдуу? Аким ошондой болуш керекпи? «Сенин үлүшүң кала берсин, калганын тарата бергиле» деди. Прокуратурага арыз жазганбыз. Прокуратура администрация карасын деп акимге берип коюптур. «Башкы планды түзүп, 6 сотыхтан чек бергиле» деп жатышат. Анда сугат жерлерге да үй салып алса болот экен да?», - деди Акылбек Мусаев.
Акылбек Мусаев кошумчалагандай, элдин 75 гектар үлүш кайрак жерин трансформация кылуу жараяны 2017-жылы башталган. Бул токтом эки ирет Бишкектен «мыйзамсыз трансформация» деп кайтарылган. Буга чейинки премьер-министрлер бул токтомго кол койгон эмес.