Turmush — «Мекендештер» рубрикасынын кезектеги каарманы — Өзгөн районунун Мырза-Аке айылынын тургуну Алина Замирбек кызы. Ал 6 жылдан бери Москва шаарында эмгектенип келет.
- Саламатсызбы, алгач өзүңүз тууралуу айта кетсеңиз.
- Мен Алина Замирбек кызы, 28 жаштамын. Учурда Москва шаарында турам. Бул жакта эл катары эмгектенип жүрөм.
- Кыз бала үчүн мигрант болуу, анын ысыгына суугуна чыдоо кандай экен?
- Албетте, эгер кыз тың болсо, суугуна да, ысыгына да чыдай алат. Негизи эле мигранттык жашоо оңой эмес. Бөтөн эл, бөтөн жер. Москва — анын тилин билгенге сонун шаар, билбегенге кыйын шаар. «Москва көз жаштарга ишенбейт» деген сөз бар эмеспи. Бөтөн элге келгенде чыйрала түшөсүң. Жашооңо өзүң гана жооп берип, өз алдынчалыкка үйрөнөсүң. Башында бир аз кыйналасың. Көнгөндөн кийин бардык кыйынчылыктар артта калат.
- Сиздин мигрант болуп калууңузга эмне түрткү болду?
- Олуттуу деле түрткү болгон эмес. Өз каалоом менен эле келе бергем. Кыргызстандан кесибим боюнча ишке орношконго каалоо да жок болду. Болгону өз күчүм менен көп акча табууну каалачумун. Ошол максатта келе бергем.
- Алгач кандай жумуштарды аркаладыңыз?
- Келип эле пиццерияда кассир, кийин менеджер болуп иштегем. Анда алган маянам 40-50 миң сом болчу. Кийинчерээк пиццерия жабылып, бир ай депрессия болуп жүрдүм. Кийин сулуулук тармагына кызыгып баштадым. Маникүр, педикүр, косметология тармактары боюнча окуп, бирөөнүн колунда иштеп жүрдүм. Андайда 40 % же 50 % акча аласың. Негизи сыртка чыкканга чейин бир кесиптин ээси болсоң, ошол тармакта иштеп, өнүктүрүп кетсең болот. Бардык нерсе ниетке жараша болот.
- Чет жакка чыгуу үчүн эмнелерге даяр болуш керек?
- Мен ушул нерсеге даяр болгула деп айта албайм. Бирок, өзүм алданып калбоого, чарчабоого даяр болуп келгем.
- Тил билүү эле жетиштүүбү же бир кесиптин ээси болуу зарылчылыгы жаралдыбы?
- Эгер расмий жумушта иштеп, мамлекет тарабынан жеңилдиктерди алгың келсе, анда кесип да, тил да керек. Анан кара жумушта иштейм десең, ага тил билүүнүн зарылчылыгы жок. Бирок, бөтөн жерде алардын тилин үйрөнүүбүз маанилүү!
- Эсте калган учурларыңыз менен бөлүшө кетсеңиз.
- Азыр мен косметологмун. Бир күнү бетин тазалатууга кардар келди. Кара тактарды сыгып жатканда, комедон бетиме шалп этип жармашып калды.
Мурунку иштеген салондун директору: «Азыр өзүң жалгыз иштеп кеткенге даяр эмессиң. Салондун ижара акысын кантип төлөйсүң? Азыр Москвада кыйын кырдаал болуп жатат?» деген сөзү эсимде калыптыр. Ошентсе да өжөрлүк менен өзүнчө бөлүнүп кеттим.
- Жакында эле салон ачтыңыз. Кыйынчылык жаралган жокпу?
- Мен өзү бир ишти баштасам, ошого бар күчүмдү жумшап, түбүнө жетмейинче тура албайм. Сүйрөлүп жүрө берген жакпайт. Оюма келгенден кийин бир айга жетпей эле ачтым. Себеби, башкага көз каранды болуп иштөө акыркы убактарда жакпай калган. Эми кыйынчылык бөтөн элде сөзсүз болот. Бирок ар бир көйгөйдүн чечүү жолу болот эмеспи.
- Көздөгөн максатыңызга жете алдыңызбы?
- Кудайга шүгүр дейм, бирок алдыда дагы чоң пландар бар. Москванын борборунан жана башка аймактардан салондорду ачсайм дейм.
- Кыргызстанга кайтып келүү ниетиңиз барбы?
- Албетте бар. Келечегимди мекенимден көргүм келет.