Turmush — Ысык-Көлдө жайкы сезон башталып, андагы эс алуучулардын акылга сыйгыс кылык-жоруктары социалдык тармактактарда кызуу талкууланса, акыркы күндөрү Ысык-Көл табияттын ар кандай кубулуштары аркылуу өзүнө көңүлдү буруп жатат.
Кара-Балта шаарынын тургуну Балыкчы менен Чолпон-Ата шаарларынын ортосундагы жолдо унаасы менен бара жатып, Ысык-Көлдүн үстүндө жаркыраган чагылганды тартып алууга үлгүргөн. «Чарк» эткен чагылган коркунучтуу көрүнгөнү менен автор музыка аркылуу тартып алган видеосуна өзгөчө көрк бере алган.
2022-жылдын 2-августунда Ысык-Көлдүн үстүндө чоң куюн болду. Аны эс алуучулар видеого тартып алышып, социалдык тармакка жарыялашкан.
Интернет колдонуучулары: «Бул табигый көрүнүш, таң калбай эле койгула. Булут ушинтип көлдөн суу алат» деген билдирүү калтырышкан.
2022-жылдын 30-июлунда Ысык-Көлдө асманда өзгөчө кубулуш пайда болгон.
Окуяга күбө болгондордун айтымында, асманда өзгөчө булуттар пайда болуп, элди таң калдырган. Видео саат 13:30 чамасында Бактуу-Долоноту айылында тартылган.
2 жума мурун аномалдуу ысык Ысык-Көлдүн жээгине эс алуучулар менен туристтердин көп агымын шарттаган. Буга байланыштуу республиканын бардык аймактарынан облуска унаалардын агымы кескин көбөйгөн.
Өткөн дем алыш күндөрү Ысык-Көл облусунда жаратылыш кырсыгы катталган. Нөшөрлөгөн жаандан кийин бир катар калктуу конуштарда сел жүрсө, башкаларында мөндүр жааган бак-дарактардагы эгиндерди жана дан эгиндерин жок кылган.
Селдин кесепетинен Боом капчыгайынан өтүүчү жол жабылган. 30-июлдагы нөшөрлөп жааган жамгырдан кийин капчыгайдан 850 гектарга чейин суу топтолгон сел жүргөн. Бишкек—Нарын—Торугарт унаа жолунун 128-130-чакырымын сел агымы жапкан.
Саат 11:00дө сел жүрүп, Кыз-Күйө айылынын башына жакын жердеги трассага агып, андан кийин унаа кыймылы жабылган. Ондогон унаалар тыгында калган.
