Turmush — Чүй облусунун Москва районуна караштуу Төлөк айылынын 36 жаштагы тургуну, фермер Кумарбек Эсеналиев дарбыз өстүрүп, гектарынан 70 миң сом киреше табууну мерчемдөөдө. Бул тууралуу аймактык кабарчы билдирди.
Райондо 12 айыл аймагында жашоочулардын басымдуу бөлүгү мал жана айыл чарбасы менен эмгектенет.
«Биздин Төлөк айыл аймагы — райондун борборунан 35 чакырым алыстыкта жайгашып, калкынын саны 1453тү түзгөн элет жергесинин бири. Бир гана айыл тутумунан турган Төлөк айыл аймагында элибиз көп жылдардан бери дыйканчылык менен алектенип, дарбыздын ар түрдүү сортторун өстүрүшөт.
Мен 36 жаштамын. 18 жашымдан бери фермер аталып, күнү-түнү куттуу "Жер эненин сырдашымын". Быйыл дарбыздын "Кримсон свит" жана башка сортун 1 га жерге өстүрдүм. Ал эми башкалар биз "Термос" деп атап алган сортун да өстүрүшөт. Алардын мен өстүргөн сорттон айырмасы өңү кара кочкул келип, кабыгы калың болот. Бирок, баарынын эле түшүмдүүлүгү жогору жана даамдуу. Дыйканчылыктын сырын терең үйрөнүп жатам. Учурда бышкан дарбыздарды килограммын18 сомдон сатсам, бизден дүңүнөн алгандар жолдун экинчи тилкесинде эле 20 сомдон сатып жатышат. Унаа жол ортосун бетон тосмо тоскондонбу, базардын өзүнүн жазылбаган ички мыйзамдарынанбы, айтор кардарлар алардан да, бизден да ала беришет. Буюрса, 1 гектар жерге өстүргөн дарбыздан таза 70 миң киреше табам деген оюм бар», - деди фермер.
Ал эми дарбыз өстүрүүдөгү мээнеттер жөнүндө баяндап, видеолорун сунуштап: «Таңдан кечке тыным албаган дыйканчылык сыртынан караганда жеңил көрүнгөнү менен бир топ оор.
Жаз алды менен кеч күзгө чейин талааларда түнөп, жер айдатып, уругун сээп, желим кагаз менен аны жаап, суу берип жетилтип, бышканда терип, базарга алып чыксаң, айрымдар "18 сом кымбат го. Азыр сезон да. Арзан эле бергиле" десе, көз алдыма эгин талаасында ысыкта кетмен көтөрүп жүргөн дыйкандын элеси тартылат», - деди Кумарбек Эсеналиев.