Turmush — Чүй облусунун Ысык-Ата районунда Милянфан деген айыл жайгашкан.
Милянфан айыл өкмөтүнүн жооптуу катчысы Айчүрөк Кокумованын айтымында, айыл көп улуттуу болгону менен бири-бири менен куда болуп, бири-биринин каада-салтын жакшы билишет.
«Кыргыз, орус, дунган улутундагылар бири-бирине кыз берип, куда болуп калышкан. Мектеп орус тилдүү, бирок кыргыз классы бар. Дунгандар уйгурлар сыяктуу эле түндүк-батыш Кытайдагы антикытайлык көтөрүлүштөн кийин качып келишкен.
20-кылымдын 20-жылдарынын башында Советтер союзунун баатыры Манзус Ванахун ушул айылда бир туугандары менен жашаган. Анын урматына үй-музей курулган. Мансуз Ванахун Улуу Ата Мекендик согушта 11-миномётчулар бригадасынын (12-артиллериялык дивизия) миномёттук расчётунда командир болгон экен.
1943-жылы 5-июлда Курск облусундагы Согласный кыштагынын түштүк-батышында душман менен болгон урушта сержант Ванахундун расчёту катардан чыккандан кийин, фашисттердин чабуулуна Ванахун өзү жалгыз туруштук бергени тарых барактарында айтылат. Акырында минаны жарып, курчап келген гитлерчилерди кыйратып, өзү да курман болгон. Ленин ордени менен сыйланган. Советтер союзунун баатыры наамы курман болгондон кийин берилген. Анын ысымы менен Милянфан айылындагы мектеп, Кант шаарындагы көчө аталган. Орёл облусундагы Малоархангельск шаарында (Россия Федерациясы) мемориалдык такта орнотулган», - деди ал.