Turmush — Таштак жерге күнөскана куруп, кулпунай өстүргөн жаш фермер менен аймактык кабарчы таанышты.
Кочкор районундагы Ак-Кыя айыл өкмөтүнө караштуу Кара-Суу айылынын 25 жаштагы тургуну Орозбек Салмоорбеков бул ишти жакында эле баштаган.
«Түркияда окуп жүргөндө кулпунайды өстүрүүнүн ыкмаларын өздөштүрүп алгам. Айылда үй-бүлөбүз менен дыйканчылык менен алектенебиз. Атам экөөбүз 500 чарчы метр жерге 4 миң кулпунайдын көчөтүн апрель айында отургузганбыз. Учурда гүлдөп, алды мөмө берип баштады. Массалык түрдө июль айынын башында сатыкка чыгарып баштайбыз.
Күнөскана курган аймак таштак болгондуктан, гидротаран менен суу алып, тамырынан тамчылатып сугарабыз. Кыргызстанда тамчылатып сугаруу бар. Бирок ал топурактын үстүн гана нымдаштырат. Ал эми тамырынан сугаруу эффективдүү», - дейт Орозбек Салмоорбеков.
Жаш фермер кулпунайдын көчөтүн Түркиядан алып келсе, керектүү топуракты Россиядан алып келген.
«Күнөсканага керектүү жабдыктардын баарын сырттан алып келгем. Ал гана эмес топуракты Россиядан алып келдим. Айылда кулпунай өстүргөндөр бар. Бирок отоо чөптөрдөн жана зыянкечтерден ар дайым арылтып туруусу зарыл. Ал эми чет жердин технологиясы менен багып жаткандыктан, жогоруда айтылган маселелер жаралбайт», - деп кошумчалады ал.
Фермер күнөсканын алдын 70 см тереңдикте казып, жылуулук чыкпаш үчүн таштарды 4 тарабына тизип чыккан.