Turmush — Нарын облусунун Соң-Көл жайлоосунда мал-жандыктар белгисиз оорудан улам өлүп баштаганын жергиликтүү тургундар аймактык кабарчыга билдиришти.
Тоголок Молдо айылынын жашоочуларынын айтымында, Соң-Көл жайлоосундагы малчылар мал-жандыктар «келесоо» сыяктуу болуп ооруп, айрымдары өлүп жатканын, ветеринардык адистер келсин деп талап кылышканын билдиришкен.
«Тооктун өлүмү аз келгенсип, эми минтип малдын өлүмү башталды. Учурда 2 малчынын короосундагы малдар өлүп жатат. Ветадистер келип текшерип, дарылабаса болбойт», - дешет Тоголок Молдо айылынын тургундары.
Учурда аймактык кабарчы бул боюнча кененирээк маалымат топтоого аракет кылууда.
Буга чейин Нарын облусунун Ак-Талаа районунун Тоголок Молдо айылында белгисиз оорудан улам тооктор өлүп жатканы айтылган. Бирок айыл өкмөт башчысы Эркинбек Сатаров оору токтогонун айткан болчу.
