Turmush — Жалал-Абад облусунун Аксы районунун Кербен шаарындагы тургундар таза сууга муктаж экенин айтып, нааразычылык билдиришти.
Жергиликтүү жашоочулардын айтымында, 2 жылдан бери таза суу жарытылуу чыкпайт. Ал эми сууга болгон төлөмдү өз убагында төлөп келишет. Район борборунда жашап, ичүүчү сууну бир нече чакырым алыс аралыктан ташып келүүгө мажбур.
Пенсия курагындагы Өктөмкан Кайнарова күн сайын неберелери менен үйдө болгон чакаларды чогултуп, араба менен кошуна көчөгө суу алганы барат. Ал бул көрүнүш 2 жылдан бери уланып келегенин айтып, буларга токтолду.
«Биз шаардын Ю.Гагарин көчөсүндө жашайбыз. Бул жерде 60ка жакын үй бар. 2020-жылга чейин биздин көчөдөн суу чыкчу, бирок андан кийин таптакыр чыкпай калды. Кээде чууруп чыгып калат. Ошол учурда үйдө болгон идиш-аяктарга суу толтуруп алууга шашылабыз. Калган күндөрү неберелер менен бирге араба түртүп, бир нече чакырымдан сууну ташып ичебиз. Кыштын күнү, жаан-чачында суу ташуудан өткөн азап жок. Жамгыр жааса кубанабыз. Себеби жамгырдын суусун идишке толтуруп алабыз. Кир жууганга ошол суудан пайдаланабыз. Эшиктин алдына бир аз жашылча эккем. Жайдын күнү суу жок, куурап турат.
Суу көйгөйүн айтып кайрылбаган жерибиз калган жок. Кербен шаардык мэрия, суу канал башкармалыгы, а түгүл район акимчилигине чейин барып, маселебизди айтканбыз. Тиешелүү жетекчилер «эртең суу чыгат» дейт, 2 жыл болду жарытылуу суу иче элекпиз. Пенсия тиер замат коммуналдык чыгымдарды төлөгөнү шашам. Ушул мезгилге чейин ичүүчү сууга карызым жок. Ичпеген сууга кантип акча төлөйм? Эми эмне кыларымды билбей калдым», - дейт Ө.Кайнарова.
Ал эми Кербен шаардык мэриясынын алдындагы суу чарба мекемесинин жетекчиси Кубанычбек Шертаев жергиликтүү жашоочулардын суу көйгөйү оңой менен чечилбей турганын, ал үчүн таза суу долбооруна киргизип, атайын эсептегичтерди орнотуу зарыл экенин айтат.
«Кербен шаары боюнча 60% калк таза суу менен камсыз болгон. Тактап айтканда, 2018-жылы шаарда таза суу долбоору ишке ашып, анын алкагында суу түтүктөрү тартылып, Падыша-Ата дарыясынан суу тартканбыз. Бирок ал да үзгүлтүккө учурап, калкка суу жеткирүүдө көйгөй пайда болуп жатат. Ушул тапта калаанын Жарды-Колот, Живпром, Гагарин, Мир кичи райондорунда ичүүчү сууга болгон таңкыстык бар. Себеби бул райондогу көчөлөр буга чейин айтып өткөн таза суу долбооруна кирбей калган. Сөз болуп жаткан калктуу конуштагылар сууну дагы деле скважиналардан алып ичишет. Скважинада авария болуп, суу чыкпай калган учурлар байма-бай болот. Негизги көйгөй азыр тендерде болуп жатат. Насостор алынып келген, бирок орнотууга кран керек болууда. Тендерден утуп алчу компанияны күтүп жатабыз. Таза суу долбооруна кошуп, ар бир үйгө эсептегичтерди орнотмоюнча бул көйгөй чечилбейт», - дейт Кубанычбек Шертаев
Кербен шаардык мэриясынын алдындагы суу чарба ишканасынын 4000ге чукул абоненти бар.
