Turmush — Бүгүн, 20-июнда Ош шаарынын тургуну — жеке ишкер Калыйнур Жолонов сары таш чыккан аймакта иш жүргүзүүгө тоскоолдук болуп жатканын айтып чыкты.
Ишкердин айтымында, 2015-жылы Алай жана Кара-Суу райондору чектешкен аймактарда сары таштар жайгашкан жерге чалгындоо иштерин жүргүзүү үчүн лицензия алган. Бирок буга карабай мамлекеттик кызматкерлер, жергиликтүү эл ишмердүүлүгүн жүргүзүүгө каршылык көрсөтүп, тоскоолдук кылып жатат.
«Биздин иш жүргүзүп жаткан сары таш чыккан жерди Алай районунун расмий бийлиги Алай районуна караштуу жер десе, Кара-Суу районунун бийлиги Кара-Суу районуна караштуу экенин айтып, түшүнбөстүктөр жаралып келет. Алай районунан бизге «ӨКМге, Жер титирөөгө туруктуу курулуш жана инженерлик долбоорлоо мамлекеттик институтуна кайрылып, текшерткиле» деп талап коюшкан. Биз бир жарым ай ошол жерди текшерип жүрдүк. Алар «кооптуу эмес» деген жыйынтык чыгарып беришкен. Азыр менде аны тастыктаган бардык документтер бар. Ал жердеги тургундар дагы, бийликтегилер дагы биздин иш жүргүзүүбүзгө тоскоолдук жаратууда», - деди ишкер Калыйнур Жолонов.
Бул маселе боюнча Алай районунун Гүлчө айыл өкмөтүнүн башчысы Сүйөрбек Исаев жооп берип, ишкер аталган иституттун изилдөөсүнүн жыйынтыгын көрсөтпөгөндүгүн, эгер көрсөтсө, жергиликтүү элдин макулдугу менен уруксат берилерин билдирди.
«Бул маселе 7 жылдан бери чечилбей келет. 2021-жылдын декабрь айында уруксат берилип, ал жерде ишкерлер ишин жүргүзүп жаткан. Бирок ошол жердеги жергиликтүү тургундар арызданып, кайрадан комиссия түзүлүп, Жер титирөөгө туруктуу курулуш жана инженерлик долбоорлоо мамлекеттик институтунун изилдөөсүнөн өткөрүп, анан уруксат алынышы керек болчу. Ошол үчүн иш токтотулуп турган. Алар изилдеп жатышкан, бирок бизге жыйынтыгын алып келип, көрсөтө элек. Эгер алып келсе, биз эл менен сүйлөшүп, аларда да каршылык жок болсо, макулдук беребиз. Бирок ӨКМ бизге ал жерди казуу кооптуу экенин билдирген», - деди Исаев.