Turmush — Чүй облусунун Москва районунда жылдык бюджети аз, бирок социалдык түзүмү бир топ жакшырган Беш-Терек айыл аймагы болуп саналат, деп билдирди аймактык кабарчы.
Райондун курамындагы 12 айыл аймагында 100 253 көп улуттуу калк жашайт.
- Район боюнча 2021-жылдын бюджети 204 млн 282 миң 600 сом, 2022-жылдын бюжети 217 млн 688 миң 800 сом болгон.
- 2021-жылы Александровка жана Чапаев айыл өкмөттөрү дотациядан чыккан. Учурда 6 айыл өкмөтү, тактап айтканда Ак-Суу, Беш-Терек, Предтеченка, Сретенка, Төлөк жана Целинный дотацияда.
Аймактык кабарчы билдиргендей, Беш-Терек айыл аймагынын курамында бир эле айыл бар. Ал райондун борборунан 40 чакырым алыстыкта жайгашып, Жайыл району менен чектешет. Анда көп улуттуу калк жашап, алардын басымдуу бөлүгү мал жана айыл чарбасы менен алектенет.
Айыл өкмөтүнүн 2021-жылдагы бюджети 4 млн 008 миң 500 сом болсо, 2022-жылы 3 млн 753 миң 2 жүз сомду түзөт. Башка 11 айыл аймагына караганда жылдык бюджети өтө төмөн жана дотацияда болгону менен заманбап имарат, мектеп, бала бакча, көчөлөрдү жарыктандыруу, элди таза суу менен камсыздоо жана башка социалдык түзүмдөр, абалдар бир топ жакшырган. Албетте, жашоочулардын көп жылдан бери эң көйгөйү — жол маселеси.