Turmush — Ош технологиялык университетинин байланыш тармактары жана телекоммуникация системалары кафедрасы тарабынан «Кыргызстандын түштүк аймагында санарип технологиясынын абалы» аталышындагы тегерек стол өткөрүлдү. Бул тууралуу окуу жайдын басма сөз кызматы билдирди.
Аталган иш-чаранын негизги максаты маалыматтык технология тармагында иш жүргүзүп жаткан адистер тарабынан бул багыттагы билим алып жаткан студенттерге жана бул багытта иш алып барууга кызыккан ар бир жаранга бүгүнкү күндөгү маалыматтык технологиянын заман талабына ылайык өнүгүшү жана өндүрүштө учурдагы абалы тууралуу кеңири маалымат берүү болуп саналат. Мындан сырткары маалыматтык технологиянын бүгүнкү күндө кыргыз коомчулугундагы орду тууралуу кеңири талкуу болуп, адамзат турмушундагы эң зарыл деп эсептелген технологиялардын катарында тургандыгын белгилешти.
Тегерек столго Кыргыз Республикасынын Санариптик өнүктүрүү министрлигине караштуу Байланыш тармагында жөнгө салуу жана көзөмөлдөө боюнча кызматынын, «Кыргызтелеком» ачык акционердик коомунун, «Кыргызаэронавигация» мамлекеттик ишканасынын жана башка жоопкерчилиги чектелген, маалыматтык жана байланыш тармагынын ишканаларынын кызматкерлери катышты.
«Ааламдашуу алкагында дүйнө коомчулугун өз кучагына алып жаткан маалыматтык технология күнүмдүк жашоодон тартып, бүткүл кыймыл-аракетти өз ичине камтып келет. Бир эле учурда адамзаттын жашоодо кызматын жеңилдетип, андан сырткары ден соолукка, өмүргө олуттуу зыян келтирген жагдайлары дагы аз эмес. Ошондуктан маалыматтык технологияны пайдаланууда адам өмүрүнө, ден соолугуна коркунуч келтирүүчү жагдайларын азайтуу, аларды пайдаланууда ар кандай зыяндуу тарабын дагы эске алуу керектиги жөнүндө дүйнө окумуштуулары ойлонуп жатышат. Демек жашообузду жеңилдеткен технологияны өз кезегинде ыңгайлуу пайдалануу жер планетасынын ар бир жашоочусу үчүн зарыл деп эсептелет. Бул тегерек столдо маалыматтык технологиянын биздин жергебизде өнүгүшү, аны ыңгайлуу пайдалануу менен бирге чарбаны жана өндүрүштү да өнүктүрүү тууралуу кеңири сөз болду», - деп айтылат маалыматта.