Turmush — Ак-Суу районунун Үч-Кайнар айылынын тургуну Венера Сейдинова төө куш багып, айылдаштарын таң калдырууда. Аймактык кабарчы аны менен таанышты.
Өзүнүн айтымында, 1 жылдан бери төө куш багууда.
«Бул учурга чейин Ала-Тоо, симментал породасындагы уйларды багып келдим. Кирешени арттыруу жана кыялымды орундатуу үчүн төө куш багууну чечтим. Аны асыроонун сырын интернеттен көрүп кызыгуум күчөдү. Ошентип өткөн жылдын май айында Бишкектен 1 жаштагы 3 төө куш сатып келдик. Ар бири 1000 доллардан болду.
Алгач коркуу сезим болду. Бирок адамга бат көнүп, өтө ийкемдүү болушат экен. Айылдыктар алгач таң калып, көргөндөн да коркушчу. Азыр сүрөткө түшүп кетишет. Айрым учурда бийлеп жатканын көрүп калышса, аябай суктанышат. Өткөндө мектеп окуучулары экскурсияга келишти. Ар бир келген адам сүрөткө түшүп жатып төө куштарыбыз «фотогеничный» болуп калды», - деди ал.
Буларга уйга салыштырмалуу тоют да аз кетет.
«Мисалы, эртең менен үчөөнө 1 чака жем берсек, калган учурда чөп жейт. Колду кармап, көп көңүл бурууну талап кылбайт. Короодо 1 эркек, 2 ургаачы төө кушум бар. Аларга Назбийке, Ханбийке жана Ийгилик деп ат койгонбуз. Эркелеп, бийлеп берип көңүлүмдү көтөрөт. Азыр тууп баштады. 3-4 күндө бир тууп жатат. Биринчи жумурткасы 980 грамм болчу. Экинчиси 1 кг 30 грамм болду. Негизи 1 килограммдан 2 килограммга чейин болот экен. Жумурткасына 6 киши тоёт. Жумуртка 2 түрдө болот экен. Жумуртканын сырты быдырала болсо, андан балапан чыгат. А сырты жылма жумурткадан балапан чыкпайт. Биздин климатта төө куш баспайт экен. Ошол үчүн жумурткасын чогултуп, инкубаторга бастыралы деп жатабыз. 42 күндө жөжөсү чыгат. Биз эми көбөйтөлү деп жатабыз. Эгер сатыкка чыгарса, 1 даана жумуртка 3000 сом экен. 1 килограмм эти Бишкекте 800-1000 сомдон деп жатышат. Дарылык үчүн суроо-талап жогору болот.
Айылда жакырчылык болбошу керек. Ар бир адам татыктуу жашоо үчүн аракеттенип, кирешелүү булактар менен алектенсе болот. Мисалы, мен кышында бекер жатпайын деп 75 сомдон бройлер жөжөлөрдү алдым. 45-50 күн багып, 2 кг болгондо 600 сомдон айылдыктарга саттым. Ушинтип киреше тапса болот. Уй саап, сүтүн өткөрөм. Шаардагыдай шарт түзүп, 3 баламды кем кылбай жашоо үчүн дайым аракеттенем. Жумуш жок деген жалкоонун шылтоосу. Адам биринчи өзүн толук кандуу камсыздаса, мамлекеттин өсүүсүнө өбөлгө болот», - деди ишкер айым.