Turmush — Ош мамлекеттик педагогикалык университетинин түзүлгөнүнө быйыл 97 жыл толду. Бул тууралуу окуу жайдын басма сөз кызматы билдирди.
Маалыматка караганда, 1925-жылдан бери педагог адистерди даярдоо миссиясын аткарып келе жактан окуу жайдын күнү эмгек жамааттын жана студенттердин катышуусунда салтанаттуу түрдө белгиленди. Иш-чарага президенттин Ош облусундагы ыйгарым укуктуу өкүлүнүн орун басары Данияр Жаныкулов жана Ош шаардык кеңешинин төрагасынын орун басары Шайырбек Нуранов катышып, куттуктоо айтышты. Бул менен бирге окуу жайда алгылыктуу иш алып барган окутуучуларга сыйлыктарды тапшырышты.
Иш-чаранын жүрүшүндө университеттин ректору Бекмурза Зулуев жалпы жамаатты куттуктап, окуу жайдын кең тарыхка ээ болушу менен бай тажрыйбаларды арттырып жатканын белгиледи. Аны улай окуу жайдын билим берүүсүнө, спорт тармагынын өнүгүүсүнө салым кошуп, окууда, коомдук иштерде ийгилик жараткан студенттер жана окутуучулар ардак грамота, диплом жана акчалай сыйлыктар менен сыйланды.
Ошондой эле пузыкалык-педагогикалык факультети тарабынан даярдалган чакан концерттик программа тартууланып, мында көп тилдүү хор чыгармалары аткарылып, таланттуу студенттер ар кандай аспаптарда кол ойнотушту.
«97 жыл аралыгында окуу жайдын билим берүү мейкини бир топ кеңейип, жыл сайын миңдеген адистерди даярдап, өлкөнүн бардык аймактарындагы билим берүү мекемелерин сапаттуу кадрлар менен камсыздай алды. Ош мамлекеттик педагогикалык университети билим берүүнүн сапатын камсыз кылуу кепилдиги боюнча сунуштарга таянуу менен илимдин, маданияттын, экономиканын, технологиянын жана социалдык чөйрөлөрдүн өнүгүүсүнө активдүү катышып, профессионалдык билим берүү программасын ишке ашырууда», - деп айтылат маалыматта.