Turmush — Кечээ, 17-майда Ош мамлекеттик университетинин ректору Кудайберди Кожобеков №12 кесиптик лицейдин жамааты менен жолугуп, баарлашты. Бул тууралуу окуу жайдын басма сөз кызматы билдирди.
Жолугушууда ректор жакынкы күндөрү лицейде толук реконструкциялоо иштери жүргүзүлүп, билим берүү процессин жүргүзүү үчүн шарттар түзүлөрүн айтты. Оңдоп-түзөө иштерине ОшМУ каражат бөлөт. Ошондой эле дуалдык окуу формасын өнүктүрүү (окуу процесс жумуш орунда жүргүзүлөт), өндүрүш багыттарын ачуу, билим процессин жакшыртууга басым жасалат.
Билим берүү жана илим министрлигинин чечими жана ОшМУнун макулдугу менен Ош шаарындагы №12 кесиптик лицей Ош мамлекеттик университетинин кармагына өткөн.
Бүгүнкү күндө №12 кесиптик лицейде 700гө жакын социалдык жактан аз камсыз болгон үй-бүлөлөрдүн балдары билим алат. Лицейде ширетүүчү, тигүүчү, жыгач уста, электромонтер, ашпозчу жана чачтарач багыттары боюнча кенже адистер даярдалат. Ошол эле учурда жалпы билим берүү программалары да камтылган (9-12-класстар).
Ош шаарында 1956-жылы ачылган №2 курулуш мектеби 1962-жылы окуучуларынын саны 350дөн ашкандыгына байланыштуу №12 кесиптик окуу жайы болуп кайра түзүлгөн. Ал эми 1988-жылы кайрадан №12 кесиптик лицейи болуп өзгөртүлгөн.