Turmush — Кечээ, 17-майда Маданият, маалымат, спорт жана жаштар саясаты министрлиги тарабынан уюштурулган «Достук» республикалык хор сынагы жыйынтыкталып, жеңүүчүлөр аныкталды. Сынакта Ош мамлекеттик университети байгелүү орунга татыктуу болду.
Окуу жайдын басма сөз кызматынын маалыматы боюнча, сынакка жалпы 10 хор коллективи катышып, алар дүйнөлүк классикадан тарта улуттук чыгармаларга чейин аткарышты. Алгачкы жолу уюштурулган сынакка университеттин искусство факультетинин жамааты да катышып, 2-орунду ээлеп, уюштуруучулардын 75 миң сом акчалай сыйлыгы жана дипломдору менен сыйланды.
Иш-чарага окуу жайдын хор жамаатын доценттер Ажимамат Боронбаев, Жеңиш Мойдунов жана ага окутуучулар Канышайым Сагымбаева, Рахматилла Ормонов даярдап барды.
Сынак хор ырдоо өнөрүн жайылтуу, коомчулукту хор чыгармачылыгы жана аткаруучулук чеберчилиги менен тааныштыруу максатында уюштурулуп, жаңы чыгармачылык байланыштарды түзүү жана тажрыйба алмашуу максатында өткөрүлдү.