Turmush — Ош облусунун Кара-Суу районунун Савай айыл өкмөтүнө караштуу Октябрь айылынын тургуну Зарипбек Жоошбеков 33 жылдан бери дыйканчылык менен алектенип келет. Аны менен аймактык кабарчы маек курду.
Зарипбек Жоошбеков 1989-жылы Кара-Суу районундагы Таширов [Хайтахун Таширов — Ош облусундагы «Кызыл-Шарх» колкозунун төрагасы, Социалисттик эмгектин 2 жолку баатыры болгон] атындагы колхоздо сугатчы болуп иштеп баштаган. 3 жылдан кийин эсептөөчү болуп, андан кийин башкы агроном болуп 11 жыл эмгектенген. Ал мындай чоң жерди иштеткенге чейин көптөгөн жолдорду басып өткөнүн айтат.
«1996-жылы окууну бүтүп келгем. Алгач сугатчы болуп иштедим. Атам ушул жерде бригадир болуп иштечү. Өзүм кесибим боюнча агрономмун. Окууну бүтүп келип, агроном болом деген ниет болгон эле. Бирок алгач 3 жыл өзүмдүн айылымда сугатчы болуп иштедим. Андан кийин ижарачы болдум. Иштеп отуруп 11 жыл башкы агроном болуп эмгектендим», - деди ал.
Анын айтымында, Кара-Суу районунун Октябрь айылындагы 150 гектар жерге күзгү буудай менен арпа айдаган. Ал атайын элита жана супер элита сортундагы үрөн алып келет.
«Биз элита, супер элита үрөндөрүн алып келип эгебиз. Негизгиси жакшы буудайдын, пахтанын үрөнү керек. Өкмөттөн бизге 120 гектар жер бөлүнүп берилген. Анын 80 гектарына буудай, арпа, калганына пахта, 5 гектарына беде эгебиз», - дейт дыйкан.
Дыйкан орто эсеп менен жылына буудайдын 1 гектарынан 30 миң сомдон 40 миң сомго чейин пайда көрсө, пахтадан 70 миң сомдон 80 миң сомго чейин киреше табат.
Ал жүздөгөн гектар жерлерди ижарага алып иштетет.