Turmush — Советтик армиянын Ооган жергесинен чыгарылганына быйыл 33 жыл болду. Ал кездеги эрдиги үчүн «Кызыл жылдыз» орденинин кавалери Кубанычбек Азизов менен Turmush басылмасынын кабарчысы маек курду.
Каракол шаарында Кубанычбек Азизовдон тышкары «Кызыл жылдыз» орденинин дагы бир кавалери бар.
Азизов 1967-жылы 23-мартта ошол кездеги Фрунзе (азыркы Бишкек) шаарында туулган. Атасы Сагын Азизов партия тапшырмасы менен Каракол шаарына келген. Андан улам Кубанычбек ушул шаардагы №6 мектепте билим алган. Мектепти аяктагандан кийин борборго сапар алып, Каржы-экономикалык техникумуна тапшырган. Биринчи курста билим алып жатканда, советтик армиянын катарына чакырылган. 1985-жылдын октябрь айында Ооганстандын Пули-Хумри шаарынын тегерегиндеги Келагай өрөөнүндө 24785-полкунун зениттик-артиллериялык батереясында кызматын өтөгөн. 28 жолу аскердик согуштук операцияларга катышып, эки жолу жарадар болгон.
«Ал кезди көп айтууну жактырбайм. Согуш болбосунчу. 1987-жылы март айында бир айлык согуштук операцияга чыгып, Файзавад жергесине болдук. Ал жерден бандиттик топторду жок кылуу учурунда курчоодо калган элем. Курчоодо 3 адам калдык: мен, командир, саперлордун старшинасы. 7-8 саат үчөөбүз салгылашып турдук. Анда старшина Фархад аттуу жигит окко учту. Командир Виктор Антонов жаракат алды. Мен старшинанын сөөгүн жана жаракат алган командирди курчоодон алып чыктым. Командирдин жараты оор болгондуктан аны сүйрөп, душмандарга ок атып отуруп, курчоодон чыктык. Бул маалда сезимдеримди айтсам, өмүр үчүн күрөш болгондуктан баш жакшы иштеп, бардык аскердик ыкмаларды колдонот экенсиң. Бул салгылашуу советтик армия үчүн ийгиликтүү болду. Анткени бул салгылашуунун натыйжасында бир банда толугу менен колго түшүрүлгөн.
Ошол салгылашууда мен дагы жаракат алып, Ташкент шаарына госпиталга түштүм. Бир айдан кийин аскердик мөөнөтүм бүтүп, үйгө кайтып келдим», - дейт ал.
Учурда 3 баланын атасы.