Turmush — Жалал-Абад шаарында милиция кызматкери өнөкөт оорусу бар жаранга биринчи медициналык жардам көрсөттү. Бул тууралуу ОИИБдин басма сөз кызматы билдирди.
Маалыматка караганда, аталган жаранга ИИМдин Баңгизаттарды мыйзамсыз жүгүртүүгө каршы күрөшүү кызматынын Жалал-Абад облусу боюнча башкармалыгынын ыкчам кызматкери — милициянын капитаны Сардар Машарипов жардам көрсөткөн.
«Окуя Жалал-Абад шаарындагы соода дүкөндөрүнүн биринде 2-февраль күнү 12:30 чамасында болгон. Ал жерге милиция кызматкери банкоматтан акча алганы кирип, өнөкөт оорусу кармаган жаранды тегеректеп турган топ адамды көргөн. Жерде жаткан жарандын оозун ачууга жетон колдонуп, артка кеткен тилин чыгарган. Ошол учурда жаран милиция кызматкеринин колун бир нече ирет тиштеп жиберген. Бирок ага карабастан кызматкер өз милдетин аткарып, эс-учун жоготкон жарандын өмүрүн сактап калды. Бир аз убакыттан соң жаран эс-учуна келген», - деп айтылат маалыматта.