Turmush — Кемин районунун Чым-Коргон айылынын тургуну Манасбек Жамангулов 10 жылдан ашык убакыттан бери мал багып, фермерлик менен алектенип келет. Фермер менен аймактык кабарчы таанышты.
Ал тоют чөп кымбаттагандан бери аз санда мал байлап жатканын айтты.
«Быйыл байлоого аз эле баш мал киргиздим. Адатта ондоп мал киргизчүмүн. Тактап айтканда, быйыл сарайга 3 бука, 4 кунаажынды байлоого киргиздим. Бирок чарбамда сүт багытындагы саан уйлар бар.
Быйыл тоют чөп, жем кымбаттады. Ошодуктан өзүм 3 гектар жерден силос тоютун алдым. Ошол силос бир топ жеӊилдик берип жатат. Берки чөп-жемге караганда үнөмдүү болот экен. Мал байлап сатуу кыйын эле болуп бара жатат. Кызмат акылары дагы кымбат. 1 букага бир айга 10 миӊ сом чыгым кетет. Ошондо аны 6 ай байлайбыз. Жалпы 60 миӊ сом кетет. Анан базарга алып барып, 80-90 миӊ сомдон 150 миӊ сомго чейин сатабыз. Бул өзүбүздүн уйлардан туулган букалар. Ал эми базардан сатып алып, байлагандар өзүн актабай калып жатканын айтышууда», - деди ал.
Фермер чет өлкөдө мигрант катары иштеп келип, алгач дүкөн ачып иштетсе, кийин мал чарбага өткөн.
«Чарбам ушул эле айылдагы үйүбүздүн короосунда жайгашкан жана Орловка шаарынын жанындагы тоодо кашарыбыз бар. Сүт жана эт багытындагы уйларды жана жылкы багабыз. Уйларыбыз Ала-Тоо, швицкая, симменталь породасынан. Арасында кыргыз уйлар дагы бар.
Өзүм Казакстанда көп жыл бою ашканаларда официант болуп иштеп келгем. 20 жашымда үйлөндүм. Анан соода тармагы менен 5-6 жыл алектенип, ушул эле айылда чакан дүкөн иштеттим. Анан барып уй чарбасын түзүп, ушул багытка өтүп кеттик. Ошондо 23 жашта болчумун. Жайкысын малдарды жайлоого чыгарабыз. Өзүбүздүкүнө кошуп, элдин малын дагы алып кетебиз», - деди ал.
----------------------------------
Өлкөдөгү фермерлер тууралуу «Кыргызстандагы ийгиликтүү 120 фермер» журналынан окуй аласыз.
Журналда миллиондогон кирешелерди тапкан алдыңкы малчылар, дыйкандар, багбандар, балыкчылар, аарычылар жана башкалардын ийгиликтеринин сырлары, даректери, телефон номурлары жазылган.
Баасы 1000 сом.
Журналды бардык облустардан алууга мүмкүнчүлүк бар. Ал үчүн Бишкек шаарындагы башкы кеңсенин +996 (312) 45 66 72, +996 (312) 65 02 04 жана 0(550) 26 50 13 номурлары иштейт же aimak.akipress@gmail.com электрондук дарегине кат жазыңыз.