Turmush — Жогорку Кеңештин депутаттыгына бир мандаттуу №29 Свердлов шайлоо округунан талапкер Ырысбек Мааткабылов шаар тургундары менен жолугушуусун улантууда. Тагыраагы, талапкердин кезектеги үгүт иштери Бишкек шаарындагы Бакай-Ата жаңы конушунда өттү.
Жолугушууга өз районунун жана аталган конуштун ичиндеги көйгөйлөргө кайдыгер карабаган көптөгөн жарандар келди. Алар аталган калктуу конуштун инфраструктурасында маселе бар экенин, жол, канализация маселелери тургундарды түйшөлтүп келгенин айтышып, бала бакчаларда балдар ойноочу аянтчалардын эскилиги жетип, иштен чыгып калганын билдиришти. Андан сырткары бийлик башындагыларга да нааразычылыктар бар экенин жашырышкан жок. Алсак, аймактын инфраструктурасын жакшыртуу боюнча долбоорлорду ишке ашырууда бийликтегилер убагында акча каражатын бөлүп беришпей, иштер өз убагынан кечеңдеп жаткандыгын мисал кылышты.
Депутаттыкка ат салышып жаткан Ырысбек Мааткабылов калктын бир катар суроолоруна жооп берерден мурда анын шайлоо алдындагы программасында алардын көтөрүп жаткан көйгөйлөрү да камтылып жана аны чечүү жолдору сунушталганын айтты. Ошондой эле, ал колдоп келгендерге ыраазычылык билдирип, алдына койгон максаты жана шайлоо алдындагы программасы тууралуу кеңири тааныштырды.
«Мен экономикадагы оор абалды, жумушсуздуктун күн сайын күч алышын чыдап карап тура албайм. Ошондуктан өлкөбүздүн өнүгүшүнө жана элибиздин жашоо турмушун жакшыртууга өз салымымды кошсом деген ак ниет менен парламенттин депутаттыгына талапкерлигимди коюп жатам», - деди Мааткабылов.
Ошондой эле, ал программасында куру убадалар эмес, реалдуу ишке аша турган долбоорлор сунушталганын белгиледи. Мисалы, программада жакырчылык менен күрөшүү, чакан жана орто бизнести колдоо, айыл чарба, туризм, логистика жана IT-технологиялар тармактарында жаңы жумуш орундарын түзүү жана башка ушул сыяктуу долбоорлор каралганын билдирди. Аны менен бирге эле программасында социалдык тармакка да өзгөчө маани берилип, мугалимдер жана дарыгерлерге татыктуу эмгек акы төлөө жана ар бир жарандын дартын аныктоого, медициналык тейлөөнүн жеткиликтүү болушун камсыздоо сыяктуу пунктар каралганын айтты.
Андан сырткары, ал элдин көтөргөн көйгөйлөрү боюнча төмөнкүчө кыскача токтолду.
«Ооба, сиздердин көтөргөн маселени абдан жакшы түшүнүп турам. Мен сиздерге эртең эле жолуңарды оңдотуп, тротуарларды салып, көчөлөрдү борбордук канализацияга кошуп жана көчөңөрдү жарыктандырып берем дегенден алысмын. Бирок сиздердин колдооңуздар менен Жогорку Кеңешке келип калсам, анда мен парламентке келген күндөн тартып бул маселенин үстүндө иш алып барып, райондун инфраструктурасын жакшыртууга бар күчүмдү жумшайм. Ал үчүн жергиликтүү өз алдынча башкаруу органдары менен иш алып барууну жолго коюп, жаңы балдар аянтчаларын, эс алуу жайларын курабыз. Жолдорду жана тротуарларды оңдоп, канализацияларды жөнгө салабыз», - деп кошумчалады.
Муну менен бирге эле ал 28-ноябрда Жогорку Кеңештин депутаттарын шайлоо өтөрүн, бул күнү бүтүндөй өлкөнүн тагдыры жана элдин эртеңки келечеги аныкталарын айтып, шайлоочуларды туура тандоого чакырды.
«Сиздер эртеңки келечегибизге кайдыгер карабай, мага ишеним артып, добушуңуздарды берсеңиздер үмүтүңүздөрдү актайм деп ишенимдүү түрдө айта алам. Анткени, Жогорку Кеңеште сиздерге татыктуу кызмат кылуу үчүн билимим, кесиптик жана турмуштук тажрыйбам жетиштүү», - деп сөзүн жыйынтыктады Мааткабылов.
Иш-чаранын соңунда конуштун тургундары Ырысбек Мааткабылов жакшы үмүттөрдү жаратып жатканын айтышып, ушундай талапкерлердин парламентке келишин каалай тургандарын жашырышкан жок. Андан сырткары тургундар талапкерге ийгиликтерди каалап, ак баталарын беришти.
Кыргызстанда 28-ноябрда Жогорку Кеңештин депутаттарын шайлоо өтөт. Ырысбек Мааткабылов шайлоо бюллетенинде №4 менен катталган.
Аткаруучу: «АКИ Кыргызстан» ЖЧКсы, дареги: Бишкек ш., Москва көч. №189
Буюртмачы: Кыргыз Республикасынын Жогорку Кеңешинин депутаттыгына талапкер Мааткабылов Ырысбек Шаршенбаевич
Нускасы: 1 даана,
Даярдалды: 2021-жылдын 17-ноябры
Кыргыз Республикасынын Жогорку Кеңешинин депутаттыгына талапкер Мааткабылов Ырысбек Шаршенбаевичтин шайлоо фондунун каражаттарынан финансы боюнча ыйгарым укуктуу өкүлү Өмүралиева Мээрим Замирбековна тарабынан төлөндү.