Turmush — Кыргызстанда тамаш-ашка колдонулуучу козу карындын жүздөй түрү бар. Ал эми жашоочулар арасында анын ондой түрү көп колдонулат. Козу карынды кургатып, туздап, маринаддашат.
Биолог Ирина Стежконун айтымында, бүгүнкү күндө жасалма жол менен өстүрүлгөн козу карындын бир килограммы базарда 300 сомдон жогору бааланат. Ал эми туздалган козу карын түрүнө жараша 250 сомдон 650 сомго чейин сатылат. Козу карынды чогултуу жашоочулар арасында «тынч аңчылык» деп аталып жүрөт. Тамак-ашка колдонулуучу козу карынды Кыргызстандын түндүгүнөн, Ысык-Көлдөн, токойлордон жана башка жерлерден табууга болот. Козу карын эрте жазда пайда болуп, кеч күзгө чейин өсөт. Айрымдарын кышында да көрүүгө болот. Өзгөчө өлкөнүн түндүгүндөгү карагайлуу токойлор жегенге боло турган козу карындарга бай. Бул жерлерден болжол менен бир нече миң центнер козу карын жыйналат.
«Арча токойлорунда жегенге боло турган козу карындар аз. Бул жерден талаа ак козу карынын табууга болот. Бирок бул козу карындар арча токойлорунда Суусамыр өрөөнүнүн толуу жана тоо этектериндеги аймактарына караганда аз кездешет. Токойсуз аймактарда козу карын сезону жаздын экинчи жарымында жана жайдын биринчи айларында башталат», - деди ал.
Кыргызстандын бийик тоолуу аймактарындагы климаттык өзгөчөлүктөрдөн улам «тынч аңчылык» март айынан декабрь айына чейин актуалдуу.
«Козу карын сезонун апрелдин ортосунда баштайбыз. Жазгы козу карындарды кургатып же жууп, тоңдуруп коем. Аны ээриткенден кийин жаңы терилген козу карындай эле болот. Андан кийин майдын ортосунда же аягында аба ырайын карап, Суусамырга барабыз. Ал жерде ак талаа козу карыны, шампиньон өсөт. Алар жетишээрлик көлөмдө чоң болот. Бир жолу Суусамырдан 4 кг 300 граммдык козу карын тапкам. Күзгө жакын жана күзүндө Ак-Түз, Кемин жана Ысык-Көлгө «тынч аңчылыкка» чыгабыз», - деди козу карын чогултуу менен алектенген Владимир Добров.
Козу карын бат бузулуучу азыктардын катарына кирерин, бат жана кылдат тазалоону талап кыларын эске алуу керек. Козу карындан жасалган ысык тамакты экинчи күнгө калтырбоо зарыл. Эгер калып калса, жылытпай, кайра кууруп же кайнатуу сунушталат. Мындан тышкары жегенге боло турган козу карынды чогултуу керек.