Turmush — Нарын облусунун Ат-Башы районундагы Кара-Суу айылында «АЮ Холдинг» ишканасы тарабынан «Мамалак» бала бакчасынын имараты курулуп бүттү. Бул бакча 2021-жылдын 26-октябрында расмий ачылып, айылга кайтарымсыз негизде пайдаланууга берилди.
Бала бакчадан келечекте Олимпиада оюндарынын чемпиондору чыксын деп ырым кылынып, аталышы 1980-жылдагы Олимпиада оюндарынын талисманы болгон мамалак менен үндөш коюлган.
Ачылыш аземде белгилүү балбандар — грек-рим күрөшү боюнча Токиодо өткөн Олимпиаданын күмүш медалынын ээси Акжол Махмудов жана Норвегиянын Осло шаарында өткөн күрөш боюнча дүйнө чемпионатынын коло медалынын ээси Алибек Осмонов катышты.
«Мамалак» бала бакчасы үч тайпадагы 85 баланы тарбиялоого ылайыкталган. Жалпы 800 чарчы метр аянтта кенен уктоочу бөлмөлөр, оюн залдары, ашкана, медициналык пункт, тамак-аш жасоочу жана чарба бөлмөлөрү жана башкалар жайгашкан. Комплекстин аймагында балдардын 4 аянтчасы бар.
Бала бакча толугу менен эмерек жана керектелүүчү жабдуулар менен камсыздалган.