Turmush — Оштогу Араван районуна караштуу Алля Анаров айыл аймагындагы Араван айылынын 45 жаштагы тургуну Мадеминжан Эрматов үй-бүлөсү менен курма дарагын өстүрүп, мол түшүм алып жатат. Аймактык кабарчы багбан менен таанышты.
Өзүнүн айтымында, былтыр 3 тонна түшүм алган. Быйыл 4 тонна түшүм алууну пландап жатат.
«25 жылдан бери дыйканчылык жана багбанчылыктын бардык тармагында иштеп келе жатабыз. Араванда бардык өсүмдүк өсөт. Бирок ар биринин өзүнчө түйшүгү бар. 60 сотых жеримдин 15 сотых жер тилкесине курма дарагын эккенбиз. Мындан 10 жыл мурда эгип, 8 жылдан бери түшүм алып жатабыз. Эгилгенден кийин 2-3 жыл аз түшүм алып, андан кийинки жылдары ойлогондой түшүм бере баштайт. Былтыр 3 тонна түшүм алсак, быйыл түшүм мол болуп, 4 тоннадан ашык түшүм алууну пландап жатабыз. Курма дарагынын башка дарактардан айырмасы – түйшүгү аз. Мөмөсүнө курт-кумурска түшпөйт. Ошол себептен жер семирткич да, ал эми бутактарына курт-кумурскаларга каршы дары да сеппейм. Бир тараптан күзүндө бышканы да жакшы. Анткени жазында иш көбөйгөндө жана күн өтө ысып кеткенде кароо, жыйноо жагынан бир топ кыйынчылыктар болот. Ал эми күздө салкын, жумуш аз болгон убакта шашпай теребиз. Элдин акырында терип сатам. Анткени дайыма мага келген кардарым бар. Бишкек шаарына алып кетип, андан ары Казакстан, Орусияга алып кетет», - деди ал.
Багбан курманы кечиктирбей, өз убагында сугарып, астындагы чөптөрдү убагында оруп туруу керек экенин айтат.
«Жер семирткичтерди да көп талап кылбайт. Курманын башка мөмөлөрдөн өзгөчөлүгү – бышканда мөмөсү жерге түшүп кетпейт. Мисалы, алма, гилас, алмурут жана башка дарактардын мөмөсү өтө бышып кетсе, жерге төгүлүп, жок болот. Курма андай эмес. Жалбырактары түшүп калса да, мөмөсү түшпөйт. Учурда багыбызда курманын бир түбүнөн 50-60 кг түшүм алабыз. Жерибизде курманын королевский, шоколад жана лимон деген сорттору өсөт. Былтыркы жылга салыштырмалуу быйыл түшүм жакшы. Эми баасы базарда жогору болсо, киреше да жакшы болот», - деди ал.
Мадеминжан Эрматов 1 уул жана 1 кыздын атасы.
