Turmush — Маркум Баяман Эркинбаев негиздеген эл аралык Алыш федерациясы Эгемендүүлүк күнүнө карата 31-августта Кадамжай районунда алыш күрөшүнүн бел боо менен күрөшүү түрү боюнча мелдеш уюштурду. Мелдеш өспүрүмдөр жана чоңдор арасында өттү. Аталган мелдешке Кыргызстандын жана Өзбекстандын дүйнө чемпиондору, Азия чемпиондору, Бүткүл дүйнөлүк көчмөндөр оюндарынын чемпиондору болуп, жалпы 150 балбан катышкан.
Мелдештин ачылыш аземине президенттин Баткен облусундагы ыйгарым укуктуу өкүлүнүн орун басары, Кадамжай районунун акими, Кадамжай шаарынын мэри, Фергана облусунун губернаторунун орун басары, Фергана облусунун «Күраш» федерациясынын вице-президенти катышты.
Эл аралык Алыш күрөш федерациясынын президенти Адилет Баяман уулу мелдешке катышкан балбандарга ийгилик каалап, федерация алыш күрөшүн дүйнөгө жайылтуу боюнча жигердүү иштерди алып барып жатканын, бул жаатта алгылыктуу иштер аткарылып, Кыргызстандын аймактарында алыш күрөш боюнча мелдештер байма-бай өткөрүлүп турарын, анын максаты спортту пропагандалап, дени сак жаштарды калыптандырып, аталган күрөштү Олимпиаданын программасынын катарына киргизүүгө аракет кылып жатканын айтты.
«Алыш күрөшү кыргыз элинин улуттук күрөшү болуп саналат. Элибиздин улуттук күрөшү боюнча мелдештер байма-бай өтүп келүүдө. Бул күрөштү дагы да жайылтуу, эл аралык деңгээлге жеткирүү максатыбыздын артында талыкпай иштеп келебиз. Буюрса күрөштүн бул түрүн Олимпиаданын программасына киргизүүгө болгон аракеттер жүрүп жатат. Мен ойлойм, бул күрөштүн арты менен нечендеген эр-азаматтар, канчалаган спортчулар өсүп чыгып, мамлекетибиздин социалдык-экономикасына, жашоо образына, салматтыгына чоң жардамын берет. Андыктан спортко болгон, алыш күрөшкө болгон мамилеңиздерди өзгөртпөңүздөр», - деди Адилет Баяман уулу.
«Мелдеш жогорку деңгээлде өттү»
Аталган мелдеш чоң салтанат менен коштолуп, элдин маанайы жогору болду. Кадамжай районунда акыркы учурларда мындай эл аралык чоң мелдеш боло электигин чогулгандар айтышты. Алардын бири — коомдук ишмер, Кадамжай шаарынын тургуну Мырзамамыт Маликов.
«Бүгүн Кыргыз Республикасынын 30 жылдык мааракеси. Эл аралык Алыш федерациясынын мелдеши жогорку деңгээлде өттү. Бул мелдештин максаты жаштардын арасында спортту пропагандалоо, дени сак улутту калыптандыруу болуп саналат экен. Мына ушундай чоң эл аралык иш-чара акыркы учурда Кадамжайда боло элек эле. Ушул мелдеш үчүн уюштуруучуларга, мурдагы вице-премьер-министр Чолпон Султанбековага ыраазычылык билдиребиз», - деди Маликов.
Алыш күрөш боюнча Кыргызстандын курамасынын башкы машыктыруучусу Каныбек Абытов мелдештин деңгээли жогору болгонун, дүйнөлүк жана эл аралык мелдештердин чемпиондору катышканын белгиледи.
«Мына бүгүн чоң күрөш болду. Өзбекстандан, Кыргызстандын бардык облустарынан спортчулар келип катышты. Бул мелдеш эл аралык деңгээлдеги чоң мелдеш болду. Чогулган элге көтөрүнкү маанайдагы атмосфера жаратып бергени үчүн спортчуларга, уюштуруучуларга ыраазычылык билдиребиз», - деди Абытов.
Ал эми алыш күрөш боюнча кураманын ага машыктыруучусу Кабыл Бөрүбаев мындай эл аралык мелдештердин байма-бай уюштурулушу алыш күрөштүн деңгээлин эл аралык макамга көтөрө турганын белгилеп, кыргызстандыктарды Эгемендүүлүк майрамы менен куттуктады.
Намысты бекем карманган спортчулар
Алыш күрөштүн бел боо түрү боюнча мелдеш алгач өспүрүмдөр арасындагы беттештер менен башталды. Аталган беттеште байгеге федерация тарабынан сыналгы, чаң соргуч, турмуш-тиричиликке керектелүүчү меш коюлуп, өз ээлерин тапты.
Ал эми негизги беттештер андан кийин башталды. Анда 18 жаштан жогорку курактагы балбандар арасында 60 килограмм салмактагы, 80 килограммдан ашык салмактагы балбандар килемге чыкты. Балбандардын килем үстүндөгү беттештерин чогулган эл көтөрүнкү маанайда көрүп отурушту. Айрыкча финалдык беттештерде көрүүчүлөр кызыл чеке болуп талашып-тартышып, мелдешти шаңга бөлөштү. 60-70-80 килограмм салмактагылар арасында жеңүүчү болгон 9 балбан финалдык этапка өтүп, мелдештин кызыгын дагы да арттырышты. Жыйынтыгында финалдык мелдеште 70 килограмм салмакта Ноокат районунун балбаны Роман Сапаров баш байгеге коюлган «Фольксваген Пассат Б5+» унаасына ээ болду.
Мелдештин жеңүүчүлөрү:
70 кг: 1-орунду Марлен Абдурасулов, 2-орунду өзбек балбаны Файозбек Абдугаффаров, 3-орунду Роман Сапаров, 4-орунду Элбек Айдаров ээледи.
80 кг: 1-орунду Нурсейит Тагайбек уулу, 2-орунду Үсөн Жаныбек уулу, 3-орунду Алымбек Сапаров, 4-орунду Муратбек Садиров ээледи.
+80 кг: 1-орунду Тайлак Таиров, 2-орунду Орозбек Аширов, 3-орунду Жыргалбек Дыйканов ээледи.
Абсолюттук финалда 1-орунду Роман Сапаров, 2-орунду Орозбек Аширов алды.