Turmush — Ысык-Көл облусунун Жети-Өгүз районуна караштуу Тосор айылы тууралуу Turmush басылмасынын аймактык кабарчысы маалымат чогултту.
Мектеп директору Азамат Букаров айылдын байыркы тарыхы жөнүндө төмөнкүлөргө токтолду.
«Тосор деген аттын пайда болушу "Эр Табылды" эпосунда жазылган. Тосор айылы мурда Ак-Чий деп аталчу экен. Ошол убакта калың ак чийди аралап кирип кеткен төөлөр көрүнбөй калчу деп айтып келишет. Эпосто Эр Табылды Чалкалмактын жылкысына Жууку боюнан тийип, азыркы Тамга айылынын тушуна келгенде жылкыларга өзүнүн эн тамгасын басат (ушундан улам айылдын аталышы Тамга деп аталып калган). Артынан сая түшкөн Чалкалмактын жоокерлери Ак-Чийге жеткенде жылкыларын алдыга айдатып жиберип, жоону тосуп талкалаган. Ошол салгылаштан кийин айыл Тосор деп аталып калган. Жердин оордуна Желдеңдин бир баласы Муратжандын урпактары байыр алып отурукташып калган экен», - деди ал.
Тосор айылы — Ысык-Көлдүн түштүк жээгиндеги түздүктө, Бишкек—Каракол унаа жолунун боюнда, Тосор суусунун чыгыш тарабында, деңиз деңгээлинен 1641 метр бийикте, райондун борбору Кызыл-Суу айылынан 55 чакырым алыста жайгашкан.
Жергиликтүү эл мал чарбачылыгы жана дыйканчылык менен алектенишет. Калкынын саны 2600 адамга жетет.
«Эр Табылды» эпосу — кыргыз калкы басып өткөн катаал күндөрдүн изи, баатырдык күрөштөрүнүн, илгери үмүт, ой-тилектеринин элеси, жандуу тарых катарында эл көңүлүндө, ой-сезиминде сакталып, идеялык-мазмуну бийик, көркөмдүгү жогору чыгарма.
