Turmush — Быйылкы жылы Жалал-Абад шаарында 15 көп кабаттуу үй борборлоштурулган жылытуу системасына кошулат. Бул маалымат «Кыргызжылуулукэнерго» мамлекеттик ишканасынын башкы директору Болот Жусупбеков калаадагы от казандардын кышка болгон даярдыгы жана оңдоп-түзөө иштеринен кабар алган учурда белгилүү болду.
Маалыматка караганда, 7 кабаттуу үйлөрдө жылуулукка кошуу системасы толугу менен бүткөрүлгөн. Дагы 2 үйдүн жер төлөсүндө жумуш кызуу жүрүп жатат.
Жалал-Абад райондор аралык жылуулук менен камсыздоо өндүрүштүк бирикмесинин филиалынын жетекчилиги тарабынан калкка тынымсыз түшүндүрүү иштери жүргүзүлөрү жана аларга уланган көп кабаттуу үйлөргө берилип жаткан жылуулуктан улам борборлоштурулган жылуулукка кошулуу үчүн кайрылгандар арбый баштады. Быйылкы жылы өкмөттүн тапшырмасына ылайык, электр энергиясын үнөмдөө үчүн да элди жылуулукка кошууга басым жасалып жатат.
«Өкмөт токтомунун негизинде кышка даярдык иштери жүрүп жатат. Бизде жалпы 136 откананын ичинен 90 откана кышка даяр болуп калды. 1-сентябрга чейин отканалардын баары толугу менен даярдалып бүтөт. Электр энергиясын үнөмдөө үчүн электр энергиясы менен иштеген отканалар альтернативдүү көмүргө өткөрүү боюнча да жумуш жүрүп жатат. Бизде электр энергиясына туташкан жалпы 29 откана болсо, быйыл төртөө көмүр отунга алмаштырылды. Тактап айтканда, Таш-Көмүр шаарында эки, Нарында эки откана өттү. Бул кадам жыл сайын улана берет. Жыл сайын жылуулук системасына кошулууну каалагандар көбөйө баштады. Быйыл Жалал-Абад шаарынан эле 15ке жакын көп кабаттуу үйлөр кошулат. Калаадагы электр энергияга болгон талап азаят. Таш-Көмүр шаарында 3, Базар-Коргон районунда 2 кабаттуу үйдүн жашоочулары уланса, быйыл 1 көп кабаттуу үй уланат. Шамалды-Сайда 1 мектеп, 1 бала бакча кошулуп жатат», - деди ал.
Болот Жусупбеков отканалардын жылуулук эсептегичтери, ачып-жабуу каражаттарын оңдоо жана майлоо иштери, оператордун бөлмөсү жана өлчөө каражаттарын көзөмөлдөө тапшырмаларын берди. Мындан сырткары кызматкерлердин коопсуздугу биринчи орунда болушу керектигин эскертти.
«Кыргызжулуулукэнерго» мамлекеттик ишканасынын «Жалал-Абаддагы райондор аралык жылуулук менен жабдуу өндүрүштүк бирикмеси» филиалынын жетекчиси Рахман Кожомбердиевдин айтымында, быйылкы жылы 10 отказан жаңыланды. Бардык отканаларды актап-сырдоо дээрлик аягына чыгып калды.
«Биздин калаада 16 отканада, жалпысынан 54 отказан иштейт. 7 откана — мазут, 5 откана — көмүр жана 4 откана газ менен жылытылат. Октябрь айына чейин 15 көп кабаттуу үй жылуулукка уланып бүтөт деп жатабыз. Бул иш аягына чыкса, шаарда борборлоштурулган жылытуу системасына кошулган көп кабаттуу үйлөрдүн саны 70ке жетет. Жылына 2 миң тонна мазут, 1800 тонна көмүр керектелет. Бул боюнча тендер өткөн. Сентябрь айынан тарта ташылып баштайт. Буюрса 15-сентябрга чейин кышка толук даяр болобуз», - деди Р.Кожомбердиев.
Жалал-Абад шаарындагы борборлоштурулган жылуулукка уланган абоненттердин саны быйыл 2 миңдин тегерегин түзөт.