Turmush — Түштүк аймактагы Курманжан датка атындагы кыздардын жалгыз лицейине кабыл алуунун 2-туру 1-май күнү өткөрүлөт.
Маалым болгондой, 1-туру апрель айында өткөрүлүп, ага жалпы 3 миңдей окуучу катышкан. 2-турга аймактардан да окуучулар чакырылууда. Бүгүнкү күндө Курманжан датка лицейинде 7-11-класс болуп жалпы 310 окуучу билим алууда. Кабыл алуунун жүрүшү, жеңилдиктер, шарттар тууралуу лицейдин директорунун окуу иштери боюнча орун басары Жоомарт Мырзаматов айтып берди.
«Пандемияга байланыштуу 2 жылдан бери сынактар онлайн түрүндө өткөрүлүп жатат. 1-турда тарых, география, математика, орус тил, кыргыз тил, биология сабактарынан 50 тапшырма берилди. 2-турга 25 суроо түзүлгөн. 2 турдан тең 1-орунду алган окуучу 100 пайыздык арзандатуу менен окуй алат.
Ошондой эле үй-бүлөлүк шарты эске алынат. Бир тууганы биздин мектепте окуса, ага да жеңилдиктер каралат. Курманжан датка кыздар лицейи түштүк аймактагы жалгыз лицей болгондуктан, 2-турга Баткен облусунан, Ноокат районунан да окуучулар чакырылды. Сынактардан өткөн мыкты окуучуларды бардык шарттар менен камсыз кылып, өнүгүүсүнө, мыкты билим алуусуна бүт жолду ачып бере алабыз», - деди Мырзаматов.
Курманжан датка кыздар жатак лицейине кабыл алынган окуучу мектепте келишимдик негизде окугандыктан китептер, бирдей кийим менен камсыз болушат. Түрдүү ийримдер, кошумча сабактар, эс алуу үчүн түзүлгөн шарттар окуучулардын билим менен гана алек болушуна мыкты өбөлгө түзөт.