Turmush — Баткен облусунун Лейлек районуна караштуу Бешкент айылынын Эски-Оочу айылынын эки тургуну изделип жатат.
Социалдык тармактарда курулуш жүрүп жаткан жерде түнөгөн эки жигиттин жоголушу боюнча видео-маалымат тарап жатат. Анда эки тургун жаткан чатырдын ичи чачылып, бут кийимдери кан болуп, жерде жатканы, телефондору калганы айтылат.
Социалдык тармактардан алынган видео
Баткен ОИИБдин басма сөз кызматынын маалыматына караганда, 2021-жылдын апрель айынын башынан бери Лейлек районунун Бешкент айыл аймагынын Эски-Оочу айылынын түштүк тарабында тигүү цехи курулуп жаткан. Бул аймак Тажик Республикасынын Б.Гафуров районуна жакын жайгашкан.
Лейлек районунун Бешкент айылынын Эски-Оочу айылынын тургундары — 2002-жылы туулган А.Дастан жана 2000-жылы туулган К. уулу Кубатбек курулуш иштерин жүргүзүп, 23-апрелде саат 22:00 чамасында курулуш материалдарын коруп жатуу максатында курулуш болуп жаткан жерге келип түнөшкөн. 24-апрелде экөө тең үйүнө барган эмес.
Бул факт Лейлек РИИБдин материалдардын электрондук журналына катталып, ыкчам-тергөө тобу түзүлүп, текшерүү иштери жүрүп жатат. Дайынсыз жоголгон эки жаран боюнча багыттамалар түзүлдү.
Кийинчерээк УКМК дагы бул боюнча тиешелүү иш-чаралар жүрүп жатканын билдирди.
«Бул факт боюнча маалыматты тактоо максатында Кыргызстандын жана Тажикстандын чек ара өкүлдөрүнүн жолугушуусу өтүп жатат.Мамлекеттик чек аранын бул тилкесинде абал туруктуу», - деп айтылат маалыматта.