Turmush — Каракол шаарынын тургуну Жанара Шамиева декреттик эс алууда. Бул кезде ал өзүнүн киреше алып келген ишин ача алды. Жаш эне менен аймактык кабарчы маек курган.
Шамиева Жанара Кубанычбековна 1991-жылы туулган. Кесиби боюнча бухгалтер. Учурда жолдошу менен эки уул, бир кызды тарбиялап жатат. Кызын төрөп, үйдө отурган кезде ашкананын сырларын өздөштүрүүдө. Ал жасаган килкилдекти (холодец) коноктор, жакындары абдан жактырат. Мындан улам андан киреше табуу идеясы келген.
«Апам (Дамира Курманова) экөөбүз жасаган холодецти баары жактырып жешет. Анан кызыгуу пайда болду. Азырынча шаардын борборундагы жана биз жашаган жердеги дүкөндөргө таратып жатабыз. Буюрса кардарларыбыз көбөйүүдө», - дейт ал.
Иш баштаганда ал дагы кыйынчылыктарды баштан кечирген.
«Эмчектеги кызым болгондуктан башында абдан эле кыйын болду. Шүгүр, апам жардам берет. Кээде жолдошум да кол кабыш кылат. Холодец — бул адамга эң маанилүү витаминдүү тамактардын бири болгондуктан көпкө эзилте кайнатып алам. Ал 6-7 саатта даяр болот», - дейт Жанара.
Бул аралыкта Жанара малдын этин бир карап, жашын аныктоого көндү. Себеби, жаш малдын этинен гана жакшы килкилдек даярдоого болот.
«Уйдун туяк сөөгүн, бир аз этин, анан даамдуу болуш үчүн башка сөөктөрүн да кайнатып жиберем. Кара калемпир, лавр жалбырагы, сабиз, сарымсак, туз кошом. Эти жаш малдыкы болушу керек.
Жаңы баштаганда айырмасын билбей, картаң уйдун туягын алып, аны бир жарым сутка кайнатканым эсимден кетпейт. Ошондон кийин эт, туяк тандоону үйрөндүм», - дейт ал.
Баасы 40 сомдон башталат.
«Идиштерин дүң баада алабыз. Ишимден түшкөн эң биринчи кирешеме балдарыма таттуу жана өзүмө керектүү кем-карчымды алдым. Балдарым жана үй-бүлөмө жасаган бардык тамактарымды жактырып жешет. Холодецтен тышкары жайкы учурда таттууларды да жасап сатам. Торт, пирогдордун түрүн жасайм. Андан тышкары бөлмө гүлдөрүн өстүрөм. Бул менин хоббим. Алардан да кичине бизнес кылып да жиберем. Анын көчөттөрүн сатам», - дейт ал.
Каарманыбыз келечекте тамактануучу жай ачууну пландоодо.
