Turmush - Ысык-Көлдүн тоо-лыжа базасында каза болгон өспүрүм бала энеси менен Казакстандан келген. Бул тууралуу Ысык-Көл ОИИБдин басма сөз кызматы билдирди.
Маалыматка ылайык, 12-январь күнү Ак-Суу РИИБдин нөөмөт кызматына тоо-лыжа базасынан телефон аркылуу билдирүү түшүп, анда жаш өспүрүм лыжа тээп баратканда кулап, окуя болгон жерден каза болгондугу айтылган. Аталган факт райондук милициянын маалымат электрондук журналына катталып, окуя болгон жерге тергөө-ыкчам тобу жиберилген.
Алгачкы жүргүзүлгөн тергөө амалдарынын жүрүшүндө, 3-январда Казакстан Республикасынын Нур-Султан шаарынын 35 жаштагы тургуну өзүнүн 13 жашар баласы И.С. менен Чүй облусунун Токмок шаарында жашаган аталаш бир тууганына мейманга келгени аныкталган.
«10-январда алар ошол аталаш бир тууганынын үй-бүлөсү менен Каракол шаарына келип, мейманканалардын бирине жайгашып, маал-маалы менен тоо-лыжа базасына барып, эс алып жүрүшкөн.
12-январь күнү болжол менен саат 13:00 чамасында өспүрүм И.С. 3040 метр бийиктикке көтөрүлүп, тоонун батыш трассасынын жолу менен ылдый түшкөн. Болжол менен 2700 бийиктиктеги трассанын батыштан чыгышка бурулган жеринен лыжа менен түшүп бара жатканда бурула албай калган. Анын кесепетинен чоӊ карагайды сүзүп, алган жаракаттарынан улам окуя болгон жерде каза болгон.
Соттук-медициналык эксперттин катышуусу менен жансыз денеге сырттан кароо учурунда оӊ буту жана мойну сынганы аныкталды. Өспүрүмдүн өлүмүнүн жагдайын толук аныктоо үчүн соттук-медициналык экспертиза дайындалып, тергөө амалдары уланууда», - деп айтылат маалыматта.
