Turmush — Чүйдүн Москва районундагы Беловодск айыл аймагынын жаштары кайдыгерликке каршы демилге көтөрүшүп, иллюстрациялык сүрөттөрдү тартышты. Бул тууралуу аймактык кабарчыга жаштар демилгечи тобунун лидери Айдай Аскарова билдирди.
Анын айтымында, 2019-жылы өлкөдө «Жаш аракет» долбоору түзүлүп, ага Беловодск айыл аймагынан 8 улан-кыз мүчө болгон.
«Коомдо жүрүп жаткан жаңылануу процессине, көз караштардын прогрессине биз да активдүү катышуубуз абзел. Анткени, улуулар: "Жаштар — биздин келечегибиз!" дешип, чакырык таштап келишет. Ырас, ушул өңүттөн алып караганыбызда биз да өз келечегибиздин багыттарын аныктоого акылуубуз жана милдеттүүбүз. Улуулардын өрнөктүү өмүрүн туу тутуп, турмуштук бай тажрыйбаларын үйрөнүү менен мамлекетибиздин ар тараптан өнүгүшүнө өз салымыбызды кошууга даярбыз. Ошондон улам Кыргызстанда "Жаш аракет" долбоору иштеп келет. Беловодск айыл аймагынан 8 жаш улан-кыздар ага мүчө.
Учурдагы пандемия элдин социалдык абалын аныктап турат. Ал эми жакынкы күндөрдө өтө турган шайлоого карата да өз оюбузду, максатыбызды, таза шайлоого болгон чын ниетибизди иллюстрациялык сүрөттөр аркылуу чагылдырдык. Беловодск айыл өкмөтүнүн көмөктөшүүсү менен баннер, жана башка сүрөт тартууга керектүү каражаттарды алып, жаштардын кайдыгерликке каршы демилгесин тарттык. Аны райондун борбордук аянтындагы тактага илип койдук. Аң-сезимге калыптанган стереотип мындай көрүнүшкө каршы болуусу да ыктымал. Бирок иллюстарациялык сүрөттөр менен биз да өз максатыбызды ачыктадык. Ал жерде депутаттыкка талапкер кимдир бирөөнүн сүрөтү жок. Тек гана иллюстрациялык сүрөттөр жана чындыкка чакырган биздин үнүбүз.
Биздин жаштар айрым бир партиялардын "арыгын" чаппайт. Улуулар бизге үлгү болсо, биз да алардын аракеттерин баалап, жаштардын демилгесин көтөрүп жатабыз. Биз үчүн чындык, ачык маалыматтык коом, адилеттүүлүк баарынан жогору. Кайдыгерликтин кесепети көптөгөн көйгөйлөрдүн уюткусуна айланды», - деди ал.
Жаштар пандемияга чейин райондо дебат, шахмат турнирлерин уюштуруп, «Жагымдуу үн» сынактарын да өткөрүп келишкен.