Turmush — Ысык-Көл облусунун аймагында коронавирустун жайылышын алдын алуу жана ага каршы күрөшүү максатында Ысык-Көл облусун өнүктүрүү фонду 14 млн сом бөлдү.
Аталган акча каражатына Ысык-Көл облустук бириккен ооруканасына жана райондук аймактык ооруканаларга суюк кычкылтек менен камсыздоо системасы орнотулууда. Орнотулган кычкылтек менен камсыздоо системалары коронавирусту жуктуруп, дарты күчөп кеткен бейтаптардын өмүрүн сактап калууга чоң мүмкүнчүлүк берет.
Бүгүнкү күндө Балыкчы шаарында 28, Ак-Суу районунда 67, Тоң районунда 40, Жети-Өгүз районунда 120 бейтапка ылайыкталган кычкылтек менен камсыздоо системасы орнотулду.
Ошондой эле облустагы саламаттыкты сактоо мекемелерине керектүү медициналык жабдыктар, дары-дармектер, жеке коргонуучу каражаттар жана алгачкы керектелүүчү медициналык буюмдар сатылып берилүүдө.
Финансы каражаттарын ачык жана максаттуу пайдаланууга Ысык-Көлдү өнүктүрүү фондунун байкоочу кеңеши көзөмөл жүргүзөт жана сарпталган каражаттардын отчеттору алынат.
Буга чейин Ысык-Көл облусундагы коронавирус инфекциясын алдын алуу жана анын жайылышын көзөмөлдөө иштерине Ысык-Көлдү өнүктүрүү фонду тарабынан 12 млн сом, «Кумтөр Голд Компани» ишканасы тарабынан 100 миң доллар бөлүнгөн.