Turmush — Элибизде «берген колдон сооп үзүлбөй, алган колдон береке кетпесин» деген кеп бар. Кайрымдуулук иштерин тынымсыз жасаган Эмилбек Жусупов жардамга муктаж жарандарга тынымсыз көмөк көрсөтүп келүүдө. Жусупов элге кылган кызматын атуулдук милдети катары эсептеп, калктын эртеңине жарап жатат.
Жаш экенине карабай калктын калың катмарындагы көйгөйлөрдү билген Эмилбек Жусупов кайсы гана мезгил болбосун кайрымдуулук иштерин токтотпой турганын айтты.
«Биз түрдүү багыттагы иш-чараларга материалдык жактан жардам берип, ден соолугу чектелген, аз камсыз болгон инсандарга көмөк көрсөтүп, бала бакча, спорт аянтчаларын куруу менен гана чектелбейбиз. Алдыда аябай көп максаттарыбыз жана пландарыбыз бар. Ошол себептен азыркы учурда “Эмаком” кайрымдуулук фондун ишке киргиздик. Анткени биз дарбазадан үмүттүү тиктеген балдарды көрдүк. Кээ бири карабай кеткен балдарын күтсө, дагы бири таанышы кирип, ал-жайын сурап калабы деген илгери үмүт менен жашайт. Биздин максатыбыз — бир аз болсо да элибиздин аярлуу катмарын азайтып, карылардын жана балдардын көнүлүн алып, жашоосуна үмүт жаратуу. Биз Ош шаарындагы “Боорукердик” балдар жана карылар үйүнө, “Алтын уя” балдар үйүнө тамак-аш жана материалдык жактан үзгүлтүксүз жардам көрсөтүп келебиз. Андан сырткары аз камсыз болгон үй-бүлөлөргө жардам колун сунуудабыз. Айрымдарын айтып өтсөк, Өзгөн районундагы ден соолугунан мүмкүнчүлүгү чектелген Эрнист Турганбаевдин үйлүү болушуна жардам бердик. Андан сырткары ден соолугунан мүмкүнчүлүгү чектелген жарандарыбыздын үйлүү болушуна көмөк көрсөтүп келебиз.
Коронавирус пандемиясы тилекке каршы Кыргызстанды четтеп кеткен жок. Өлкөдөгү эпидемиологиялык абалга байланыштуу Ноокат аймактык ооруканасына көмөк көрсөтүү максатында 40 миң долларлык тез жардам унаасын бердик. Ошондой эле Бишкек шаарындагы кам көрүүгө муктаж (ата-энесинен ажыраган) 35 баланы өзүбүздүн камкордугубузга алып, алардын жашоо-шартына, билим алуусуна көңүл буруп, келечекте жумуш менен камсыздайбыз.
Ош шаарынын жашоочусу Кыздаркан Садыкованын турмуш шарты оор болгондуктан бир баласы менен 20 жылдан бери вагондо жашап, ден соолугуна көңүл бура албай, ооруп жүргөн. Садыкованын дарылануусуна кеткен каражатты өз мойнубузга алып, бүгүнкү күнгө чейин моралдык, материалдык жардамды тынымсыз көрсөтүп келебиз.
Элибиз оор сыноону башынан өткөрүп, кооптуу кырдаалда социалдык жактан колдоого муктаж болуп турган кезде "Эмаком" курулуш компаниясынын жетекчилери четте карап турган жок. Эл үчүн, элдин саламаттыгы үчүн "Эмаком" кайрымдуулук фондунун атынан үзгүлтүксүз жардам көрсөтүүдөбүз. Жалпылап айтканда, "Эмаком" компаниясы элдин эртеңин ойлойт», - деди Э.Жусупов.
Учурда "Эмаком" курулуш компаниясынын алдында негизделген "Эмаком" кайрымдуулук фондунун атынан Ош шаардык мэриясына 5 миң даана бет кап, Ноокат аймактык ооруканасына тез жардам унаасы жана 15 миң даана бет кап, Көк-Жар жана Кулатов айылдык ооруканаларына дарыгерлердин саламаттыгы үчүн 100 даана атайын форма (комбинезон), Т.Кулатов айыл өкмөтүнө 5 миң даана бет кап, Бел-Өрүк айыл өкмөтүнө 2 миң даана бет кап жана ооруканаларга антисептиктер берилди. Аны менен катар Ош шаарындагы 350, Бишкек шаарындагы 50 үй-бүлөгө азык-түлүк жактан жардам көрсөтүлгөн.
Мындан сырткары жыл сайын белгилүү даталарда үзбөй жардам көрсөтүлүп келет.
Ошондой эле Ош шаарындагы медициналык кызматкерлерге 40 миң доллар, Ноокат районундагы медициналык кызматкерлерге 10 миң доллар акча берилди.